भांगरभूंय | प्रतिनिधी
खबरां संस्था
लखनौः बॉलरांक हात दिवपी एकाना स्टेडियमाचे खेळपट्टेर लखनौ सुपर जायंटाक 18 धांवड्यांनी हारोवन रॉयल चलेंजर्स बंगळुरून गुणक्रमवारींत पांचवी सुवात मेळयली. बॉलरांनी गाजयल्ले हे मॅचींत बंगळुरून दिल्ल्या 127 धांवड्याक जाप दितना लखनौचो डाव 19.5 ओव्हरींत 108 धांवड्यांत सोपलो. सोमाराच्या जैतान बंगळुरून फाटले मॅचींत लखनौ कडल्यान जाल्ले हारीचो बदलो घेतलो.
जैता खातीर 127 धांवड्यो करपा खातीर मैदानार आयिल्ल्या लखनौ सुपर जायंटाची सुरवात सामकीच बाबत जाली. मोहम्मद सिराजान ओपनर कायल मेयराक शून्याचेर कॅच आवट केलें. पंगडाच्या 19 धांवड्यांचेर दुसरो ओपनर आयुष्य बादोनीची (4) हेजलवुडाच्या बॉलार विराट कोहलीन कॅच घेतली.ते उपरांत मॅक्सवेल आनी हसरंगान कुणाल पांड्या (14) आनी दीपक हुडाच्यो (1) विकेटी घेवन लखनौची 5.1 ओव्हरींत 4 आवट 27 अशी स्थिती केली. पंगडाच्या 38 धांवड्याचेर निकोलस पुरन (9) कर्म शर्माच्या बॉलार लोमरोरच्या हातांत कॅच दिवंन पॅव्हेलियनांत आयलो तेन्नाच लखनौक बंगळुरून दिल्लें आव्हान झेपचें ना हें स्पश्ट जालें.
6.6 ओव्हरींत 38 धांवड्यांत लखनौचो अर्द पंगड आवट जालो. कॅप्टन डुप्लेसिसान पांच बॉलरांचो वापर केलो आनी तांणी दरेकी एक विकेट घेतली. मार्कुस स्टोयनीस आनी कृष्णप्पा गौतमान पंगडाचो अर्द शेंकडो केलो. 65 धांवड्याचेर कर्ण शर्मान लखनौक आनीक एक घपको दिलो. 19 बॉलांत 13 धांवड्यो करपी स्टोयनीसाक ताणे प्रभुदेसाय वरवीं कॅच आवट केलें. ताचे फाटोफाट 66 धांवड्याचेर कृष्णप्पा (23) आवट जालो आनी लखनौची जैताची आशिल्ली- नाशिल्ली आस्त सोपली. 77 धांवड्याचेर रवी बिष्णोय (5) रनआवट जालो. नवीन उल हक (13) आनी अनिल मिश्रा (19) ही लखनौची वळवळपी शेपटी हेजलवूड आनी हर्षल पटेलान कापून काडली.
बंगळुरूच्यो 126 धांवड्यो
टॉस जिखून पयलीं खेळपाक आयिल्ल्या रॉयल चॅलेंजर्स बंगळुरूक लखनौ सुपर जायंटाच्या बॉलरांनी बांदून दवोरल्ल्यान ताकां 20 ओव्हरींत फकत 9 आवट 126 धांवड्या मेरेन कशीबशी मजल मारपाक मेळ्ळी. विराट कोहली, कॅप्टन डुल्पसिस आनी दिनेश कार्तीक सोडून बंगळुरूचे बाकीचे बॅट्समन नवीन उल हक, रवी बिष्णोय आनी अमित मिश्रा सामकार खेळपट्टेर तिगून रावपाक शकले नात.
बिष्णोय आनी मिश्रान बंगळुरूच्या बॅट्समनांक आपले फिरकीचे तालार नाचयलें. बंगळुरूची सुरवात बरी जाल्ली. पॉवर प्लेचो पुराय फायदो डुप्लेसिस आनी विराट कोहलीन घेतलो आनी 6.2 ओव्हरींत ताणी 63 धांवड्यांची दमदार भागिदारी केली. मात विराट बिष्णोयच्या गुगलीचेर स्टॅम्पआवट जातगीर तांचे घसरगुडेंक सुरवात जाली. कोहलीन 30 बॉलांत 31 धांवड्यो केल्यो. कॅप्टन डुल्पेसिसान 40 बॉलांत सगल्यांत चड 44 धांवड्यो केल्यो. दिनेश कार्तीक सोडून बाकीचे खेळगडे दोन आंकडी धांवड्यो लेगीत करपाक शकले नात. कृष्णप्पा गौतमान अनुज रावताक (9) आवट केलें. ग्लेन मॅक्सवेलाक (4) बिष्णोयान एलबीडब्ल्यू केलें. अमित मिश्रान डुल्पेसिसाक आनी सुयश प्रभुदेसायाक आवट केलें. महिपाल लोमर 3 आनी कर्ण शर्मा 2 धांवड्यो करपाक शकले. मोहम्मद सिराज शून्याचेर आवट जालो. नवीन उल हकान तांच्यो विकेटी घेतल्यो. 11 बॉलांत 16 धांवड्यो करून दिनेश कार्तीक रनआवट जालो. वनिंदू हसरंगा 8 धांवड्यो करून नाबाद रावलो. नवीन उल हकान 30 धांवड्यांत तीन विकेटी घेतल्यो. बिष्णोय आनी अमित मिश्रान दरेकी दोन विकेटी घेतल्यो. हेजलवूड आनी कर्ण शर्मान दरेकी दोन विकेटी घेतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
