भांगरभूंय | प्रतिनिधी
वि स्तारवादी चीनान पाकिस्तान, भूतान आनी श्रीलंकेक व्हड रिणां दिवन आपले सुवादीन करुन दवरलां. श्रीलंकेचें दिवाळें वाजलां, तर पाकिस्तानाचें दिवाळें जावपाचें आसा. श्रीलंकेच्या दाट रानांत चीनान रडार केंद्र उबारलां. खास करून ह्या रडाराचो धोको अर्द्या भारताक आसा. तशेंच अमेरिकेंत आनी ब्रिटनांतूय ताचो आंवाठ पावूंक शकता. ही रडार यंत्रणा नौदलाच्या हालचालीचेर नदर दवरपाक उपेगी पडटा. ह्या रडारा वरवीं चीन दक्षिण भारतांतल्या अणुकेंद्राचे नदर दवरतलो. भारताच्या हिंद म्हासागरांतल्या हालचालींचेर लक्ष दवरतलो. तो भारताची हेरगिरी करपाक शकता अशें जायत्या तज्ञांचें मत आसा. ही खबर ‘संडे गार्डियन’ दिसाळ्यांत आयल्या. पाकिस्तानाच्या ग्वादर बंदराचेर फकत हिंदु म्हासागरा वयल्यान न्हय तर अरबी दर्या वयल्यान नदर दवरतलो, अशी खबर हालींच वाचली. दक्षीण भारतांतल्या संवेदनशील कुडलकुलम आनी अलप्पकन अणुकेंद्रीय सुविधांचेर हेरगिरी करपा खातीर चीनान श्रीलंकेचें हंबनटोटा बंदर 99 वर्सां खातीर भाड्यान घेतलां. फुडाराक हो तळ चीनाचो लश्करी तळ जावंक शकता अशी शिटकावणी भारतीय संरक्षण तज्ञांनी दिल्या.
एकंदरीत चीनाची ही चाल धूर्त आसा, भारतान योग्य वेळार जतनाय घेवपाची गरज आसा. तशेंच हे बाबतींत भारतान श्रीलंकेक शिटकावणी दिवप गरजेचें, चीनाची नदर सदांच शेजारच्या देशाचे जमनीचेर आसा. आयज लेगीत जपान, रशिया, ऑस्ट्रेलिया आदी जायत्या देशांनी चीना कडेन शिमेचे वाद आसात. चीन हो विस्तारवादी देश हें गुपीत न्हय. भारत सरकाराच्या संरक्षण खात्यान ह्या प्रस्नांचेर लक्ष दिवन उपाय काडप गरजेचें आसा.
शांताराम वाघ
9623452553
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
