भांगरभूंय | प्रतिनिधी
भारतांत पेट्रोलियम उत्पादनांचे आनी इंधनाचे वाडटे मागणेक लागून कच्च्या तेलाची (क्रूड आॅयल) गरज वाडत आसा. कच्च्या तेलाच्या आयातीचेर देशाचें अवलंबन वाडत आसा आनी देशांतलें तेलाचें घरगुती उत्पादन प्रभावी नाशिल्ल्यान अंदूं ताची आयात वाडल्या. 2022-23 अर्थीक वर्सात कच्च्या तेलाची गरज आशिल्ल्यान देशाची आयातांचेर आदारून आशिल्ली स्थिती 87.3 टक्क्यांचेर पावलां. पोरूं म्हळ्यार 2021-22 ह्या अर्थीक वर्सा ती 85.5 टक्के आशिल्ली. पेट्रोलियम मंत्रालयाच्या पेट्रोलियम नियोजन आनी विश्लेशण सेलान (पीपीएसी) हो आंकडो जाहीर केला.
कच्च्या तेलाच्या आयातीचेर भारत अवलंबून आशिल्ल्याचे आदले आंकडे सांगचे जाल्यार – 2020-21वर्सा 84.4
टक्के, 2019-20 वर्सा 85 टक्के, 2018-19 वर्सा 83.8 टक्के. कच्च्या तेलाची आयात मर्यादा मेजप हें पेट्रोलियम उत्पादनांच्या देशांतल्या वापराचेर आदारिल्लें आसता. तातूंत पेट्रोलियम उत्पादनांची निर्यात आस्पावना, कारण हो आंकडो भारताचे मागणेचें प्रतिनिधित्व करीना. वर्साक 250 दशलक्ष टना परस उणी शुध्दीकरण क्षमता आशिल्लो भारत हो कच्च्या तेलाचे संवसारांतलो तिसरो व्हडलो ग्राहक आनी एक मुखेल आयात करपी देश आसा. तशेंच पेट्रोलियम उत्पादनांची निव्वळ निर्यात करपी देश आसा.
2022-23 वर्सा भारतांत पेट्रोलियम उत्पादनांचो देशांतलो वापर वर्सुकी आदाराचेर 10 टक्क्यांनी वाडून विक्रमी 222.3 दशलक्ष टन जालो. हाचे वयल्यान खासा येरादारी इंधनाची (पेट्रोल आनी डिझेल) चड मागणी दिसून येता. देशांतल्या कच्च्या तेलाचें उत्पादन वर्साच्या काळांत 1.7 टक्क्यांनी देंवून 29.2 दशलक्ष टन जालें. 2022-23 वर्सात कच्च्या तेलाची आयात वर्सुकी आदाराचेर 9.4 टक्क्यांनी वाडून 232.4 दशलक्ष टन जाली.
भारत सरकार आयात केल्ल्या कच्च्या तेलाचेर भारताचें वाडत आशिल्लें अवलंबन उणें करपाक सोदता तरी सगळ्यांत व्हडली आडखळ म्हळ्यार पेट्रोलियम उत्पादनांची वाडट्या मागणीक लागून देशी तेल उत्पादन मंद जावप. म्हारग तेलाची आयात उणी करप हें इलेक्ट्रिक मोबिलिटी, जैवइंधन आनी येरादारी खातीर तशेंच उद्देगां खातीर हेर पर्यायी इंधन सरकारच्या यत्नांचो म्हत्वाचो हेत आसा. फाटल्या कांय वर्सांत सरकारान संशोधन आनी उत्पादन कंत्राट चड आकर्शक करून तेल आनी वायू उत्खनाखातीर विस्तृत वाठार उक्ते करून देशी कच्च्या तेलाचे उत्पादन वाडोवपाचे यत्न वाडयल्यात. आयात केल्ल्या कच्च्या तेलाचेर चड अवलंबून आशिल्ल्यान संवसारीक तेलाच्या दरांतल्या उतार- चढावाक लागून भारतीय अर्थवेवस्था असुरक्षित जाता आनी ताचो परिणाम देशाची परकी वेपाराची तूट, परकी चलनाचे सांठे, रुपया विनिमय दर आनी चलनवाडी हांचेर जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
