भांगरभूंय | प्रतिनिधी
गोंय कूळ मुंडकार संघर्श समितीः गोंयभर आंदोलन करपाची शिटकावणी
भांगरभूंय । प्रतिनिधी
पेडणें: शेती संबंदींत सरकारान हालींच विधानसभेंत शेत जमीन हस्तांतर विधेयक मंजूर केलां. हे विधेयक शेतकारांचे नदरेंतल्यान घातक आनी लॅण्ड माफिया जमीन धनयांचे नदरेंतल्यान तांकां फायद्याचें आसा. शेतकारांच्या हिता खातीर सरकारान निर्णय घेतना हें विधेयक ताकतिकेन फाटीं घेवचें, ना जाल्यार पुराय गोंयभर खर आंदोलन हातांत घेवचें पडटलें, अशी शिटकावणी गोंय कूळ मुंडकार संघर्श समितीन 27 एप्रीलाक दिली. पेडणेंचे महात्मा गांधी बांगेंत महात्मा गांधीच्या पुतळ्याक फुलांचो हार ओंपून धरणे आंदोलनाक सुरवात केली. त्या वेळार ही शिटकावणी दिली.
ह्या वेळार गोंय कूळ मुंडकार संघर्श समितीचे दीपेश नायक, म्हणयारे संतोष मांद्रेंकार, मिशन फॉर लोकलचे राजन कोरगांवकार, गोंयचो आवाज संघटणेचे स्वप्नील शेर्लेकार, नारायण गडेकार, भोवजन समाजाचे फुडारी उमेश तळावणेंकार, दिलीप कोरगांवकार, हरमलचे आदले सरपंच डॅनियल डिसोझा, सुरेश तळकटकार, किशोर गडेकार, श्यामसुंदर मयेंकार, अर्जुन साळगांवकार, प्रशांत शेठ, महादेव गवंडी, पंढरी मावळीकार, गजानन सावळ देसाय, अमृत आगरवाडेकार, सुरेश साळगांवकार, प्रवीण सिंग शेटगांवकार आनी हेर शेतकारांनी ह्या आंदोलनांत वांटो घेतिल्लो.
हें विधेयक फाटीं घेतलें ना जाल्यार शेतकारांच्यो पडीक दवरिल्ल्यो शेत जमनी तीन वर्सां उपरांत आपसूक उत्तर गोंय जिल्होधिकाऱ्यांच्या अधिकारा खाला वतल्यो आनी उपरांत ती शेत जमीन ते केन्नाय विकपाक शकतात, असो दावो ह्या वेळार उलोवप्यांनी केलो.
कसता ताची जमीन, रावता ताचें घर हो कायदो गोंयचे भाग्यविधाते भाऊसायब बांदोडकारान अंमलात हाडिल्लो. भाऊसायबांच्या मगो पक्षाचे आयज दोन आमदार वेंचून आयल्यात, तातूंतलो एकलो मंत्रिमंडळांत आसा. ह्या दोनूय आमदारांनी ह्या विधेयका आड आवाज काडून आपली भुमिका स्पश्ट करची, अशी मागणी आंदोलन करप्यांनी केली.
हें विधेयक मंजूर करतना शेतकी मंत्री ह्या नात्यान आनी भोवजन समाजाचे फुडारी म्हूण रवी नायक हांणी आवाज कित्याक काडूंक ना, असोय प्रस्न ह्या वेळार उपस्थीत केलो.
दीपेश नायक हांणी सांगलें, गोंय सरकारान कृशी विशयक कायदो चालीक लावन भाटकारांक जमनी कश्यो मेळटल्यो हाचेर भर दिला. ह्या कायद्याक लागून शेतकार खांकनवाळ जातलो. हे विधेयक म्हणल्यार शेतकारांचो खून केल्ले वरी आसा.
डॅनियल डिसोझा हांणी सांगलें, सरकारान जो कृशी विशयक कायदो मंजूर केला तो म्हणल्यार शेतकारांक काबार करपाचें कारस्थान. शेतकारांची शेत जमीन सरकार कित्याक काडून घेतलें, हाचेर स्पश्टीकरण सरकारान दिवचें.
राजन कोरगांवकार हांणी सांगलें, एक पेडणेंकार म्हूण आपणें ह्या आंदोलनाक सक्रीय तेंको दिला. कूळ मुंडकार कायद्या खाला शेतकारांच्या नांवार शेत जमनी आनी घरां करात, ते उपरांतूच नव्या कायद्यांत बदल करपाचे आसत जाल्यार शेतकारांक विस्वासांत घेवन करात.
उमेश तळवणेंकार हांणी सांगलें, सरकारान मोपा विमानतळा खातीर 90 लाखां परस चड चौखण मिटर जमनी शेतकारां कडल्यान झोमून घेतल्यात. तांकां अजून लेगीत न्याय मेळूंक ना. ह्या वेळार स्वप्नील शेर्लेकार, नारायण गडेकार, संतोष मांद्रेंकार आनी हेरांनी विचार मांडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
