भांगरभूंय | प्रतिनिधी
जायत्या बायलांक मासीक पाळीच्या वेळार खर वेदना जातात. हें दुखणें चड करून पोटाच्या क्रॅम्पच्या रुपांत आसतात. हाका लागून फाट, मांडयो, कमर आनी कुडीच्या हेर भागांत दुखता. कांय बायलांक हे वेदनेक लागून चलपाक लेगीत कठीण जाता. अशें त्रास सुमार 3 ते 4 दीस जाणवतात. हे परिस्थितीक लागून जायतीं बायलां पेन किलर गुळयांचो वापर करतात. पूण गुळयांक लागून फुडाराक जायतीं दुयेंसां जावपाची शक्यताय आसता. देखून हाचेर घरगुती उपाय म्हळ्यार मासीक पाळये वेळार पोटांत दुखता जाल्यार जिऱ्याचें उदक पियेवचें. हाका लागून वेदनेंतल्यान रोखडीच सुटका मेळूं येता.
जिऱ्याच्या उदकांत खूब एन्झायम्स आनी अँटीऑक्सिडंट घटक आसतात. ताका लागून मासीक पाळीच्या वेळार फाट दुखप, पोटात दुखप आनी स्नायूं क्रॅम्प येवप हांचे पसून आराम मेळूंक शकता. जिऱ्या उदक हें मासीक पाळयेच्या दुखण्याचें रामबाण वखद मानतात. घरांत तें सहज तयार करूं येता. हे खातीर सगळ्यांत पयलीं निवळ आयदनात दोन ते तीन पेले उदक घेवचें. उपरांत तातूंत एक कुल्येर जिरें घालचें. उपरांत एक कुल्येर गोड मिक्स करात. दोनूय उदकांत बरी भरसल्या उपरांत कांय वेळ उदक उकळून घेवचें. उपरांत पेल्यांत काडून थंड जातकच पियेवचें.
जिरें आनी गोडाच्या उदकाचे जायते फायदे आसात. 1) थंडी, खोंकली हांचे पसून सुटका मेळोवपाक गोड आनी जिरें उदक खूब फायदेशीर आसता. कुडीतले विखारी पदार्थ भायर उडयता आनी रोगप्रतिकार शक्त बळिश्ट करपाक ताचो उपेग जावं येता.
2) ताण आयिल्ल्यान मायग्रेन वा तकली दुखता जाल्यार जिरें आनी गोडाचें उदक पिवपाक मेळटा. हाका लागून
तकली दुखपा पसून सुटका मेळटली.
3) जिरें उदक वजन उणें करपाकय फायदेशीर आसा, जाल्यार गोडाक लागून पचनक्रिया सुदारता. दर दिसा सकाळीं एक पेलो जिरें आनी गोडाचें उदक रिकाम्या पोटाचेर पियेल्यार कुडीक फायदो
जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
