भांगरभूंय | प्रतिनिधी
इश्टान म्हणले – वक्ल बदल. “हालींच नवें घेतलां रे – म्हजें स्पश्टीकरण. “तशें न्हय रे, जगा कडेन सकारात्मक दृष्टीकोनांतल्यान पळोवपाक शिक, जाल्यार भलायकीय बरी उरतली.” ताणें फोडून सांगलें. “भलायकी आयज मेरेन बरी आसा, कसलेंच दुयेंस ना” – म्हजो बचाव. “मुखार जाण्टेंपणात त्रास जातलो, सांबाळ ” अशे शिटकायत ताणें कूस मारली.
दुसरे दिसा सकाळ सावन हांवें भोवतालच्यो घडणूको सकारात्मक भिंगातल्यान पळोवन लेखनाक सुरूवात केली. गोंयांत उदकाचो उणाव आनी लोकांचे हाल अशी एक बातमी आशिल्ली. हो देश विकासपुरूश मोदी हांचो. पूल, महामार्ग, विमानतळ, कसिनो बांदकामाक अग्रक्रमान उदक दिवप गरजेचें. पर्वरींत उदकाचो उणाव आसतनाय आमी अटल पुला खाला बसयिल्ले लांबचे लांब लॉन आनी लायिल्ली रेडीमेड झाडां दीसभर शिंपीत आशिल्ले. कित्याक तर जी- 20 सभासद थंयच्यान पासार जातना ती पाचवीचार सोबितकाय पळोवन तांणी गोंयंची सोबितकाय आनी मोदींच्या विकास उपक्रमांच्यो काण्यो आपापल्या देशांत पावोवच्यो म्हूण. जी- 20 च्या फलकांत वसुधैव कुटुंबकम बरयिल्लें आसा. म्हणल्यार जग हेंच आमचें कुटुंब. दलाल, कसिनोतले जुगारी, गवजी घालत सेल्फी घेवपी भोंवडीकार, राबित्याक आशिल्ले रशियन, नायजेरीयन, बंगाली, झारखंडी, राजस्थानी, युपीवाले, बिहारी, कन्नडींगा ह्या कुटुंबियांक उदक पुरवण करपाची जापसालदारी गोंयकारांची. तेन्ना सगळ्या कुटुंबियांनी उदक भागोवन वापरपाक जाय हो सकारात्मक दृश्टिकोन आमी रडनासतना आपणावपाक जाय. कन्नडीगा हे आमच्या कुटुंबाचे भाग जाल्ल्यान कर्नाटकान म्हादयचे उदक वळयलें हाचे खातीर तकली तापोवपाची, हड्डें बडोवपाची गरज ना.
अटल सेतू म्हण्टकीर पूल सात दीस येरादारी खातीर बंद केल्लो तेन्ना लोकांनी केल्ल्या तांडवाची याद जाली. इतले बेगीन पुलाची दुरूस्ती करची पडली म्हळ्यार तातूंत भ्रश्टाचार जाल्ल्याचो तांकां दृश्टांत जालो. सकारात्मकतेन पळयता जाल्यार ह्या पुलाचे बांदणेत अत्याधुनिक तंत्रगिन्यानाचो वापर केला. रस्त्या कुशीन भट्टीत डांबर उकळून तो कामगारांनी बालद्यांनी ओतून पुला वयलो रस्तो बांदिल्लो ना. थळ सेनेच्या रणगाड्या सारके दिसपी अजस्त्र यंत्रांतल्यान तो म्हारगी डांबर अपुरबायेन थंय पातळायला. आमी ब्रांडेड स्मार्ट शर्ट, पेंटा पींजसर घालनात तर ती प्रतिवर्सा बदलत आसतात, तशेंच स्मार्ट रस्ते फोंडकुलांनी भरसर दवरनात. आमी मोटारी, स्कुटरी सर्विसिंग करतात ते भशेन सरकार सांगता तशें ह्या रस्त्यांचें वर्सांन वर्सां सर्विसिंग करप गरजेचें.
तसोच स्मार्ट सिटी होवूय एक ब्रांडेड कन्सेप्ट. ताचो हिंदी, मराठी, कोंकणी वा इतर थळावे भारतीय भाशांनी अनुवाद जायना. होवूय आता ‘ऑनगोइंग प्रॉसेस ’ आसतलो हाची आमी आतांच सवय लावन घेतिल्ली बरी. आमचो स्मार्टनेस राखून दवरपा खातीर आमका पार्लरांत परतून परतून पासय मारची पडटा आनी तें प्रकरण खर्चीक आसता. स्मार्ट सिटीचेय सेम टू सेम. दर वर्सा गटार खणप, रस्ते बांदप, टायल्स- पेव्हर्स बदलप हीं कामां चालूच आसतलीं. हाचे आदीं कोणेंय हात घालूंक नाशिल्लें काम आपणें हातांत घेतलां हें समाज सेवक आमदार बाबूश म्हणटा तेंवूय खरे. शाळा सोडून बाबूश एका आमदारा हाता खाला लोकसेवेक लागिल्लो. आमदाराक झेपना हे पळोवन आमदारकीय ताणें स्वताचेर ओडोवन घेतली. लोक भुरग्यांक दोतोर, आय.टी इंजिनियर जावपाक धाडटात, हाणें मात लोकसेवे खातीर पुताक म्युनिसिपालिटींत हाडून बसयलो. आता बापूय- पूत जोडी शाराक स्मार्ट करपाक नेटान भायर सरल्यात तेन्ना येरदारी कोंयडी जाली, नाका, तोंडात धुल्ल गेलो, घरा मुखार बुरशे उदक सांठलें, ट्रक रस्त्या वयल्य़ा फोंडकुलांत लकले म्हूण मीडियान कुचित्री बातमी दित अपशकून करप समा न्हय. लोकसेवे खातीर ह्या सभाग्यान बायलेकूय रांदचे कुडींतल्यान राजकारणांत हाडून आपलो संवसार लोकसेवे खातीर रस्त्याचेर हाडलो हें आमी विसरपाक जायना. खरें तर ताका ‘स्मार्ट गोवन’ पुरस्कार फावो जाता.
सद्गुरू जग्गी वासुदेव हांच्या ‘सेव सॉयल’ हे मोहिमे खाला पणजे घडोवन हाडिल्ल्या कार्यक्रमांत मुखेल कार्यक्रम, समारंभ संबदी जायराती, बॅनर्स धरून सरकारान वट्ट ३ कोटी रूपया मातयेंत घाले, अशी म्हायती आयटीआर माहिती हक्का खाला कोणे विघ्नसंतोशी कर्मदळीद्र्यान मेळयल्या ही दिसाळ्यांत छापिल्ली बातमी दोळ्यांत खुबली. सेव्ह सॉयल होवूय स्मार्ट सिटी सारकेलो एक इवेंट ब्रांड. सद्या गोंयकारांच्यो जमनी तिसऱ्यान चवथ्याक विकून खाल्यात त्यो एसआयटीच्या मजतीन आदी ‘सेव्ह लँड’ मोहिमे खाला आमी मेळयले उपरांत ‘सेव्ह सॉयल’ प्रयोग करूं येता. खाजगी चॅनलांचेर सदरगुरूंची भाषणा लोक दुडू फारीक करून आयकतात. सदगुरूंक कितें म्हणपाचें आसता तें एकवेळ कळपाक कुस्तार जाता खंरे, पूण तांची इंग्लीश मात कास्ताद. शिवाय बॅनर छपाई, रंगकाम, स्टेज काम, भाडोत्री खुर्च्यो हातूंतल्यान गोंयकारांक रोजगार मेळ्ळो हें विरोध करपी विघ्नसंतोशींनी लक्षांत घेंवक जाय. शाहरूख खान, अक्षयकुमार, कट्रीना कैफ खाजगी लग्न समारंभात फकत नाचपाकूच 3 ते 4 कोटी रूपया फी घेतात. ते तुळेन सद्गुरू इव्हेंट सवाय म्हणू येता. गोंय सरकारान चार कोटी मोडिल्ले जाल्यारूय हरकत नाशिल्ली.
उत्तर प्रदेश सरकारान उत्तर प्रदेशातल्या वैश्विक गुंतवणूकदार संमेलनाची म्हायती जगाक कळोवचे खातीर आंतरराष्ट्रीय ‘टायम’ मासिकाच्या 13 ते 20 मार्च अंकात छापून हाडल्या चार पानी जायरातीचें उणेंच मोल पाच कोटींच्या आसपास आसा हें त्या विघ्नसंतोशींनी लक्षांत घेवंक जाय.
आयच्या राजकीय वातावरणांत पं. जवाहरलाल नेहरू हांचें नांवय घेवपाक आवडना, असो एक व्हडलो चोंबो आसा खरो, पूण ‘गोवा के लोग अजिब है’ अशे अचूक भाकीत साठ वर्सां आदीं केल्ले खातीर स्रेय नेहरूंक दिवचे पडटा. Dignity of labor – परिश्रमाची प्रतिश्ठा, तत्व पाळपी आमचें गोंय राज्य. उच्च, नीच असो भेदभाव करनासतना सगळ्या तरेच्या काम, धंद्याक समान सम्मान दिवपी. आदी आयआयटी पदवीधर राज्याचो मुखेलमंत्री जाल्लो तर आयज आयआयटी, भूगर्भशास्त्रज्ञ, अभियांत्रिक पदवीधरांक हांगा बीडीओ पदांची बहाली जाल्ली आसा आनी आयजूय फकत बारावी मेरेन शिकिल्ले, पदवी नाशिल्ले राज्याच्या कायदेमंडळाचे सभासद आसात. आठवी पास मंत्रीपदां भुशयतात. रशियेची ऑलिंपीक पदक जैतिवंत जलतरणपटू आनी आदलो पुलीस अधिकारी गोंयांत ड्रग्स विकपांत उणेपण माननात…..
…… लेखन करतना म्हाका डायबेटीजाचीं लक्षणां जाणवपाक लागल्यांत. भलायके खातीर सकारात्मक चिंतप चडूच गोड जालेशें दिसता. थांबयता.
दीपक लाड
पर्वरे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
