भांगरभूंय | प्रतिनिधी
सोशल मिडीया दरेकल्याच्या हातांत पावला आनी सगलेच पत्रकार, लेखक, पोस्टमन जाल्यात. जो- तो स्वताचे विचासरणे प्रमाण बरयता, दुसऱ्यांनी बरयिल्लें मुखार धुकलता. हरकत ना. पूण आपूण कितें बरयतां, फाॅरवर्ड करतां, तें समाजीक एकचाराक घातक थारूं येता काय ना, आपूण लोकांची दिशाभूल करीना मूं…. हाचो विचार दरेकल्या जापसालदार नागरिकान करपाक जाय. जांची बुद्द चरपाक गेल्या वा जे कोणाचे तरी दावणेक बांदल्यात, तांचें एक समजू येता, पूण हालींसराक सुशिक्षीत, शांत, विचारी सभावाचे मनीस पसून भयानक उलोवपाक, बरोवपाक लागल्यात. टीव्ही चॅनल, सोशल मिडिया पळयल्यार हें दिसता. दुसऱ्यांक भडकावपी पोस्ट, व्हिडियो व्हायरल जाले, खबरां चॅनलांचेर गाजपाक लागले काय मागीर आपूण तशें म्हणूंकच ना, अशेंय सांगपाक ते फाटीं रावनात. सांगपाचें म्हणल्यार राजकी, समाजीक वातावरण खोदूळ जालां…. आनी हाची दखल सर्वोच्च न्यायालयान पयर घेतली.
‘कोणूय दुस्वास पातळावपी भाशणां करपाक लागलो जाल्यार ताचे आड सोमतीच कागाळ नोंद करची. कोण कागाळ करतलो हाची वाट पळोवची न्हय. केश दाखल करपाक उशीर जालो जाल्यार तो कोर्टाचो अपमान मानतले. तो मनीस खंयच्या धर्माचो ताची पर्वा करची न्हय. अशें केल्यारुच देशाची धर्मनिरपेक्ष बुन्याद आमी बळिश्ट दवरपाक शकतले.’ सर्वोच्च न्यायालयान हो आदेश सगलीं राज्यां आनी केंद्रशासीत प्रदेशांक दिला. 2022 वर्सा असोच आदेश दिल्लो, पूण तो उत्तरप्रदेश, दिल्ली आनी उत्तराखंडा पुरतो बांदील आशिल्लो. आतां ह्या प्रकरणाचेर 12 मेक फुडली सुनावणी जातली. न्यायालयान आदेश दिला खरो, पूण परिणामकारक पद्दतीन तो चालीक लागतलोच, हें सांगपाक येना. कारण मुळांत आमच्या देशांत शेंकड्यांनी कायदे आसात आनी ते कोण व्हडलेशे मनार घेनात. संविधानांत कितें बरयलां, तें भोवतेक भारतीयांक खबर ना. समाजीक जिणेंत पाळपाचे कायदे आमी खुटयाळ्याक हुमकळावन दवरल्यात. मागीर सोशल मिडियाचेर बोगस नांवांनी खातें चलोवपी भारतीय सर्वोच्च न्यायालयाचो आदेश पाळटले, हाची खात्री दिवं नज. सरकारी यंत्रणांकूच सायबर विभाग जागे करून ह्या लोकांचेर कारवाय करची पडटली. हालींच गोंयांत दोगी भयणींची चवकशी जाली, तशे हेरांचेय कान पिळीत जाल्यार हो दुस्वासाचो चिखलकालो नियंत्रणा खाला येतलो.
न्यायालयान हो आदेश दितना बरींच निरीक्षणां उक्तायल्यांत. धर्माच्या नांवाचेर आमी खंय पावल्यात, असो प्रस्न दोनूय न्यायाधीशांनी केलो. ‘सद्दां उठून टीव्ही, भौशीक माचयांचेर दुस्वास पातळावपी उलोवपां जातात. हे लोक स्वताचेर नियंत्रण दवरपाक शकनात? फुडारी राजकारणांत धर्माचो वापर बंद करतले, तेन्ना हीं दुस्वासी भाशणां बंद जातलीं. नाजाल्यार लोकशाये खातीर हें एक दीस सामकें मारक थारतलें. देवाक आमी ल्हान केला. ताच्या नांवाचेर राजकारण चल्लां’, अशेंय न्यायालयाक दिसता. पं. नेहरू, अटलबिहारी वाजपेयी हांकां आयकुपाक पयसुल्ल्यान लोक येताले, हें आजच्या फुडाऱ्यांनी मतींत घेवचें, अशें उदाहरणूय न्यायालयान दिलें. मजगतीं, फाटल्या कांय म्हयन्यांनी देशभरांत हिंदुत्ववादी तशेंच तांचे विरोधी विचारसरणीच्या लोकां आड हेट स्पीच वयल्यान साबार कागाळी न्यायालयांत पावल्यात. ह्या निर्देशा वेळार सर्वोच्च न्यायालयान, राज्य सरकारांक हे बाबतींत वेळार काम करपाक सांगलां. ओग्गी रावत जाल्यार मागीर तीं आसून फायदो कितें, अशेंय न्यायालयाक दिसता.
फक्त दुस्वासी भाशणां, विखारी उतरांच न्हय तर गाळी पसून संवपाचे प्रकार घडल्यात. सोशल मिडियाचेर न्हय, तर टीव्ही कॅमेऱ्या मुखार. महाराष्ट्रांत तर हाचे वयल्यान वादूय जाल्यात. सोशल मिडियाचेर राष्ट्रीय दिसाळ्यांच्या बातमे सकयले कमेंट सुसंस्कृत मनशाक वाचपाक जावचे नात, इतले भयानक आसतात. ह्या वाॅट्सअॅप पदवीधरांचेर पयली कारवाय जावंक जाय. एक म्हयन्या पयलीं सर्वोच्च न्यायालयान टीव्ही अँकरांचेर बडी मारिल्ली. चर्चा करतना कोणूय दुस्वासी भाशा वापरता जाल्यार ताका आडावपाक जाय, अशें न्यायाधीशांनी म्हणिल्लें. हेट स्पीच नियंत्रण कायदो करपाची सरकारान घोशणा केल्ली. तें काम खंय मेरेन पावलां? फकत हेट स्पीच न्हय, तर लोकांची दिशाभूल करपी खबरोय बंद जावंक जाय. ह्यो खबरो अशे तरेन पिकयिल्ल्यो आसतात, की स्वताची बुद्द वापरपी व्यक्ती पसून भ्रमांत पडटा. हें खरें काय फट हो प्रस्न तिका पडटा. तेन्ना दिशाभूल करपी कोल्यांकूय न्यायालयान चाबूक मारूंक फावो. दुस्वास पातळयत रावल्यार आमचें राष्ट्र दुबळें जातलें आनी ताचो फायदो दुस्मान देशांक जातलो, हें आमकां कशें कळना?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
