भांगरभूंय | प्रतिनिधी
खबरां संस्था
रावळपिंडीः रावळपिंडीत जाल्ले दुसरे वन-डे मॅचींत पाकिस्तानान फखर जमानाच्या नाबाद 180 धांवड्याच्या नेटार नूझिलंडाक 7 विकेटीनीं हारयलें. अशे तरेन पाकिस्तानान पांच वन-डे मॅचींचे माळेंत 2-0 अशी आघाडी घेतल्या. पयलीं खेळून न्यूझिलंडान 50 ओव्हरींत 5 आवट 336 धांवड्यो केल्यो. पाकिस्तानान 48.2 ओव्हरींत 3 बाद 337 धांवड्यो करून मॅच आपल्या नांवार केली.
न्यूझिलंडाच्या डावाची सुरवात बाबत जाली. 33 धांवड्यांचेर तांका पयलो धपको बसलो. ओपनर विल यंग 19 धांवड्यो करकून 6वे ओव्हरींत आवट जालो. ते उपरांत चॅड बोवेस आनी डॅरीच मिचेलान डाव साल्वार केलो. ताणी दुसरे विकेटी खातीर 86 धांवड्यांची भागिदारी केली. बोवेस 119 स्कोराचेर आवट जालो. ताणे 51 बॉलांत आपलो अर्द शेंकडो (51) पुराय केल्लो. बोवेस आवट जातगीर मिचेलान आनी टॉम लाथमा जोडी जमली. तिसरे विकेटी खातीर ताणी 183 धांवड्यांची भागिदारी करून पंगडाचो स्कोर 300चेर व्हेलो. मिचेलान 119 बॉलांत 129 धावड्यो केल्यो. लाथमान 85 बॉलांत 98 धांवड्यो केल्यो. शेकंडो करपाक ताका दोन धांवड्यो उण्यो पडल्यो. मार्क चॅममन एकूय धांवडी करपाक शकलो. जेम्स निशामान 17 आनी हॅन्री निकोर्स 6 धांवड्यांचेर नाबाद रावलो.
337 धांवड्यांचो फाटलाव करतना पाकिस्तानान डावाची सुरवात बरी केली. फखर जमान आनी इमाम उल हकान पयले विकेटी खातीर 66 धांवड्यो केल्यो. इमाना 26 बॉलांत 24 धांवड्यो करून आवट जालो. उपरांत कॅप्टन बाबराक वांगडा घेवन पंगडाक 201 स्कोराचेर व्हेलें तांणी दुसरे विकेटी खातीर 135 धांवड्यांची भागिदारी केली. बाबरान 66 बॉलांत 65 धांवड्यो केल्यो. अब्दुल्ला शफीक 7 धांवड्यो करून आवट जाल्या उपरांत मोहम्मद रिजवाना वांगडा फखरान चवथे विकेटी खातीर 119 धांवड्यांची भागिदारी केली. फखरान हे माळेंत आपलो दुसरो आनी फाटल्या तीन वन-डेंत आपलो तिसरो शेंकडो पुराय केलो. ताणे 144 बॉलांत 17 चौक्यांचे मजतीन 180 धांवड्यांची नाबाद खेळी केली. रिझवान 41 बॉलांत 54 धांवड्यो करून नाबाद उरलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
