भांगरभूंय | प्रतिनिधी
खबरां संस्था
चेन्नयः निमाण्या बॉलामेरेन उमळशीक वाडोवपी आयपीएलाचे 41वे मॅचींत चेन्नस सुपर किग्जाक तांच्या चेन्नयच्या चेपॉक स्टेडियमाच्या बालेकिल्ल्यांत पंजाब किंग्सास निमाण्या बॉलाचेर 4 विकेटीनी हारोवपाचो पराक्रम केलो. पंजाबा आड बरी कामगिरीची पुनरावृत्ती करपाक एमएस धोनीचो पंगड अपेशी थारलो आनी सुमार 15 वर्सां उपरांत ताका चेपॉक मैदानार आपल्या लोकां सामकार हार खावची पडली.
चेपॉकाचेर दोनूय किंग्सा मदीं पंजाब सरस थारलो. चेन्नयन पंजाबा सामकार जैता खातीर 201 धांवड्याचें लक्ष्य दवोरल्लें. पंजाब किंगास निमाण्या बॉलाचेर तीन धांवड्यो काडून 4 विकेटींनी थरारक जैत मेळोवन, जो जीता वही ‘सिकंदर’! हें दाखोवन दिलें, पंजाबाक जैता खातीर निमाण्या 6 बॉलांक 9 धांवड्यांची गरज आशिल्ली. सिकंदर रझा आनी शाहरुख खान क्रिजेर आशिल्ले. त्या वेळार ज्युनियर मलिंगा म्हणून फामाद आशिल्लो मथिशा पाथिराना बोलींग करतालो. रझान पयल्या बॉलार एक धांवडी घेतली. शाहरुखाक दुसऱ्या बॉलाचेरूय एक धांवडी घेवपाक मेळ्ळी. तिसरो बॉल डॉट बॉल आशिल्लो. रझान चवथ्या आनी पांचव्या बॉलार दरेकी दोन धांवड्यो घेतल्यो. पंजााबाक तिमाम्या बॉलाचेर 3 धांवड्यांची गरज आशिल्ली. पाथिरानान स्टंपाचेर स्लो बॉल घातलो आनी रझा स्क्वेर लेगा कडेन तो मारता आनी तीन धांवड्यो घेवपाक धांवता. अशे तरेन निमाण्या बॉलाचेर चेन्नयक हार खावची पडली.
ताचे पयलीं चेन्नस सुपर किंग्जान टॉस जिखून पयलीं बॅटींग करपाचो निर्णय घेतलो. चेन्नय खातीर कॅप्टन धोनीन निमाण्या दोन बॉलांत सके हुबोवन पंगडाचो स्कोर 200चेर व्हलो चेन्नयच्या डेव्हॉन कॉनवेन सगल्यांत चड नाबाद 92 धांवड्यो 52 बॉलांत 16 चौके आनी 1 चौक्यान केल्यो. ऋतुराज गायकवाड आनी कॉनवेन पंगडाच्या डावाची बरी सुरवात केली. ताणी पयले विकेटी खातीर 86 धांवड्यांची भागिदारी केली. 10वे ओव्हरींत ऋतुराजाक 37 धांवड्याचेर आवट करून सकिंदर रझान ही जोडी फोडली. ते उपरांत दुबे आनी कॉनवे हांणी दुसरे विकेटी खातीर 44 धांवड्यांची भागिदारी करून डाव फुडें व्हेलो. अर्शदीपान चौदावे ओव्हरींत दुबंक 28 धांवड्यांचेर आवट केलो. मोईन खान 10 धांवड्यो करून आवट जालो. राहुल चहरान ताची विकेट घेतली. 20वे ओव्हरींत रवींद्र जडेजा 12 धांवड्यो करून सॅम करनाक विकेट दिली. धोनीन निमाण्या दोन बॉलांत सके मारून पंगडाची स्कोर 200चेर व्हेलो.
प्रभिसिमरन सिंग (42) आनी कॅप्टन शीखर धवनान (28) पंजाबाक बरी सुरवात करून दितना 50 धांवड्यांची सलामी दिली. तुषार देशपांडेन ही जोडी फोडली. सॅम कुरियन (29) जितेश शर्मा (21) पंगडाचो शेंकडो पुराय केलो जाल्यार लियॉन लिव्हिंगस्टोनान 4 सके आनी 1 चौक्यांन 40 धांवड्यो करून पंगडाचो अर्द शेंकडो पुराय केलो. 6 बाद 186 उपरांत सिकंदर आनी शाहरुखान जैताचे सोपस्कार पुराय केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
