भांगरभूंय | प्रतिनिधी
भारताचे सात्विक साईराज रंकीरेड्डी आनी चिराग शेट्टी हे जोडयेन आशियायी चॅम्पियनशिपीच्या दादल्यांच्या दोट्टी गटाचे फायनलींत सुवात मेळोवन इतिहास घडयलो.
आशियायी चॅम्पियनशिपीच्या इतिहासांत पयले खेपे भारत दादल्यांच्या दोट्टी गटाचे फायनलींत पावलो. दुबय चालू आशिल्ले आशियायी चॅम्पियनशिपीचे सेमी फायनलींत सात्विकसाईराज-चिराग हे जोडयेक चीनी तायनाचे ली यांग आनी वान ची लिंग हे जोडये आड फुडली चाल मेळ्ळी. चीनी तायपेची जोडी रिटायर्ड हर्ट जाली त्या वेळार भारताचे जोडयेन पयली गेम 21-18 फरकान जिखिल्ली आनी दुसरे गेमींत 14-13 फाटीं आशिल्ली. दुसरे गेमींत ची-लीन शॉर्ट मारतना जखमी जालो आनी तांणी मॅच अर्दकुटी सोडपाचो निर्णय घेतलो.
ते आदीं शुक्रारा जाल्ले क्वॉर्टरफायनलींतले मॅचींत भारताचे जोडयेन इंडोनेशियाचे मोहम्मद अहसान आनी हेंड्रा सेतियावान हे जोडयेक सगळ गेमींनी 21-11 आनी 21-12 अशा फरकान हारोवन निमाण्या चारांतली सुवात निश्चीत केल्ली. अशे तरेन 1971 उपरांत हे सर्तींतल्या दोट्टी गटांतलें पदक निश्चीत केल्लें.
सात्विक-चिराग हे जोडये आदीं 1971त दिपू घोष आनी रमन घोष हे जोडयेन जकार्ता सर्तींत दादल्यांच्या दोट्टी गटांत कांश्या पदक जिखिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
