भांगरभूंय | प्रतिनिधी
सरकारान कोंकणी भाशेच्या गिन्यानाची सक्ती केल्ल्यान महाविद्यालयीन पांवड्याचेरूय बी सगल्या विशयांतल्या इत्सूक उमेदवार शिक्षकांक कोंकणी भाशेच्या गिन्यानाची चांचणी घेवची पडटा. त्या पासत सगल्या विशयांतली कांय परिभाशीक उतरांची वळेरी करपाची म्हाका संद मेळ्ळी. तशींच त्या त्या विशया वयलीं पुस्तकां हाता लागीं दवरलीं. वनस्पतशास्त्र विशयाचे मुलाखती खातीर वनस्पत संदर्भांत पुस्तकां वाचूंक लावप, ते विशीं बरोवंक लावप हे म्हजे निकश हांव फाटलीं साबार वर्सां नेमान पाळीत आयलां.
संगणक विज्ञान विशयाचेरूय अशीच परिभाशीक उतरावळ तयार केल्ली. मजगतीं संशोधना खातीर सुटी घेतिल्ली संगणक विज्ञान विभाग मुखेली ॲनी राजन परत कोवीड काळांत रुजू जाली. कोंकणी संदर्भांतली तेदे वेळार संगणक विज्ञान विभाग मुखेली ॲनी राजन हांणी आमी यू-ट्यूबाचेर ही उतरावळ एक व्हिडियो करून सांखळ रुपान घालपाचो प्रस्ताव मांडलो. हांवेंय तो उखलून धरलो. हें काम कोवीड काळांत चालीक लागलें. आंतरविद्या शाखीय मळार वावर जावप ही एक भोवच खोशयेची गजाल. आपल्या गिन्यान शाखांची देवाण-घेवाण जावन विधायक वावर घडप भोव गरजेचें.
ताचे उपरांत नव्या राष्ट्रीय शिक्षण धोरण 2020 प्रमाण थळाव्या भासांक म्हत्व आशिल्ल्यान पयली ते चवथी मेरेनचीं कोंकणी पाठ्यपुस्तकां ऑडियो रुपांत काडपाचो प्रस्ताव ताणें मांडलो. ते प्रमाण पयली यत्तेचें पुस्तक टंकलेखन करपाक हांवें हातांत घेतलें आनी मुखेली ॲनी राजन हिणें रिकोर्डींगा खातीर कला आनी संस्कृती खात्यांत वचून चवकशी काडली आनी आमी थंय वचून हांवें तशेंच ॲनी राजन हिच्या आनीक एक इश्टीण ईशा शेटये हिणें आपलो आवाज दिलो. कोंकणी ऑडियो पुस्तकां तयार जालीं. संकेतथळाचेर तशेंच उपकरणाच्या रुपांत तीं उपलब्ध करून दिलीं. 20 ऑगस्ट, 2022 दिसा निर्मला शिक्षण महाविद्यालयाचे प्राध्यापक डॉ. रसल डिसौझा हांचे हस्तुकीं ताचें लोकार्पण जालें.
आयज काल आमी तंत्रगिन्यानाच्या युगांत वावुरतात. आमच्या धेंपे महाविद्यालयांत आदीं शिकोवपी आनी आतां फादर आग्नेल महाविद्यालयांत शिकोवपी डॉ. शिल्पा देसाय हांच्या 54,295 चे उतरां कोठयेचो आदार घेवन ॲनी राजन हांणी आपल्या संशोधना खातीर गरजेच्या कोंकणी स्पॅल चॅकराचो जल्म जालो. पायथोन ही एक लोकांमोगाळ संगणकीय भास. पायथोन 3.5 वर्जन आनी Django 2.2 हांच्या आदारार हो स्पॅल चॅकर घडयला. एके रातीन आनी एके वातीन जावपा सारकें हें काम न्हय. अजून हें काम पुराय जावंक ना. 2,657 धातू उतरांची कोठी टंकलिखीत करून ह्या वावरा खातीर उपकरायल्या ताका कुसां लागून तांचीं 60,000 उतरां घडल्यांत. जीं XML (Extensible Markup Language) आदारीत शब्दकोशाचो आदारार तयार केला. हातूंत आनीक भर घालपाची गरज आसा. तरी लेगीत www.konkanispellcheck.com ह्या संकेतथळाचेर तुमचे सेवे खातीर ऑनलायन कोंकणी स्पॅल चॅकर उपलब्ध आसा. मोबायलाचेरूय जाता. संगणकाचीच गरज ना. कोंकणी स्पॅल चॅकर तुमकां उतरां सुचयतलो. पूण संदर्भा प्रमाण तातूंतलें खंयचें उतर वेंचून काडपाचें तुमच्या हातांत आसा. जशें इंग्लीश भाशेंत स्पॅल चॅकर काम करता तेच वरी कोंकणी स्पॅल चॅकर. कोंकणी विद्यार्थी, शिक्षक, पालक, कोंकणी मोगी, कोंकणींतल्यान संशोधन कार्य अणकारीत करप्यांकूय हाचो लाव जावं येता. तुमच्यो मोलादीक सुचोवण्यो आमकां हो स्पॅल चॅकरांत सुदारणा घडोवन हाडूंक उपकरा पडटल्यो. मुजरत कोंकणी स्पॅल चॅकर वापरून पळयात.
अंजु साखरदांडे
96370 76931
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
