भांगरभूंय | प्रतिनिधी
भांगरभूंय । प्रतिनिधी
वाळपयः वाहनांची तपासणी करून पीयूसी (वाहनाचें धुंवोर प्रदूशण नियंत्रण) दाखलो दिवपाच्या शुल्कांत वाड करपाची मागणी राज्यांतल्या पीयूसी आस्थापन धनयान सरकारा कडेन केल्या. मुख्यमंत्री, येरादारी मंत्री तशेंच येरादारी खात्याच्या संचालकाक हे खातीर निवेदन दिवपाचें होंडा हांगा घेतिल्ले तांचे बसकेंत थारायलां.
फाटल्या वीस वर्सा सावन सरकारान मान्यताय दिल्ली पीयूसी आस्थापनांक जायत्या समस्यांक तोंड दिवचें पडटा. वीस वर्सां आदीं आशिल्लें तेंच शुल्क अजूनय आसा. सध्या म्हारगाय वाडल्या, खर्च चड जावपाक लागल्ल्यान पीयूसी शुल्क वाडोवपाचो सरकारान विचार करचो अशें तांणी सरकारा कडेन मागलां.
सरकारान वीस वर्सां आदीं थारायल्लो दर सध्या म्हारगायेक लागून आमकां परवडना. तो वाडोवचो तशेंच आमच्यो ज्यो समस्या आसात त्यो सुटावो करपांत सरकारान लक्ष घालपाक जाय. पीयूसी तपासपाक मशीन लागता ताचें मोल खूब आसता. दाखलो दिवंन मेळपी रक्कम आनी मशिनाचो खर्च परवडना अशें होंडा हांगाचो पीयूसी धनी शाम साखळकारान सांगलें. होंडा हांगा जाल्ले बसकेक अनिल कोर्डे, सुपरेश लिंगडकर तशेंच गोंयच्या हेर वाठारांतले 20 पीयूसी धनी हाजीर आशिल्ले.
——————–
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
