भांगरभूंय | प्रतिनिधी
खबरां संस्था
जयपूरः आपल्या घरच्या सवाई मानसिंग स्टेडियमाचेर चेन्नय सुपक किंग्साक 4 विकेटींनी हारोवन राजस्थान रॉयल्सान आयपीएलाच्या गुणक्रमवारींत पयले सुवातेर उडी घेतली. सेगीत दोन मॅचींत हार खाल्या उपरांत बिरेस्ताराक राजस्थानात आपले रॉयलपण दाखोवन दिलें .यशस्वी जयस्वाल (77), ध्रुव जुरेल (34) देवदत्त पड्डिकल (27) आनी स्पीनर अॅडम झाम्पा हे राजस्थानाच्या जैताचे शिल्पकार थारले.
यशस्वी जयस्वालाच्या आयपीएल कारकिर्दींतल्यो बेस्ट 77 धांवड्यो आनी ध्रुव जुरेल आनी देवदत्त पड्डिकलान निमाण्या ओव्हरींत 20 बॉलांत केल्ल्या 48 धांवड्यांक लागून राजस्थान रॉयल्स पयलीं खेळून 20 ओव्हरींत 5 आवट 202 धांवड्यो करपाक शकलो. जुरेलान 15 बॉलांत 2 सके आनी 3 चौक्यांनी केल्ल्या 34 धांवड्यांत लागून राजस्थान दोनशेंचो पांवड्यो हुबपाक शकलो.
येशस्वी जयस्वाल आनी जोस बटलरान राजस्थानाच्या डावाची सुरवात नेटान केली. जयस्वालान 26 बॉलांत आपलो अर्द शेंकडो पुराय केलो. बटलर आनी ताणे पयले विकेटी खातीर 86 धांवड्यो जोडल्यो. रवींद्र जडेजान बटलराक (27) कॅच आवट करून ही जोडी फोटली. येशस्वीन 43 बॉलांत 8 चौके आनी 4 सक्यांनी 77 धांवड्यो केल्यो. तुषार देशपांडेन अजिंक्य रहाणे वरवीं ताका कॅच आवट केले. डावांतले आकाश सिंगाचे पयलेच ओव्हरीचेर ताणे तीन चौके मारले. 6 ओव्हरींत पंगडाक 64 धांवड्यांचेर व्हरतना यशस्वीन 21 बॉलांत 40 धांवड्यो केल्यो. बटलरान ताका बरो वांगोड दिलो.
4 आवट 146 उपरांत जुरेल आनी पड्डिकलान पांवचे विकेटी खातीर केल्ल्यान 49 धांवड्याचे भागिदारीक लागून राजस्थान दोनशें धांवड्यां मेरेन पावपाक शकलो. एके सुवातेर दोन धांवड्यो घेतना महेंद्र सिंग धोनीन जुरेलाक रनआवट केलो. पड्डिकलान 13 बॉलांत 5 चौक्यांनी नाबाद 27 धांवड्यो केल्यो. विकेटकीपर आनी कॅप्टन संजू सॅमसनान 17 धांवड्यांचें योगदान दिलें. तुषार देशपांडेन 2, रवींद्र जडेजा आनी एम थिकशानान देरकी एक विकेट घेतली. मलिंगा सारकी बॉलींग करपी श्रीलंकन महेशा पथिरानान आपल्या 4 ओव्हरींत सगल्यांत चड 48 धांवड्यो दिल्यो.
बरे सुरवाते उपरांत घसरगुंडी
येशस्वी जयस्वाला भशेन ऋतुराज गायकवाडान चेन्नय सुपर किंग्गाच्या डावाक नेटान सुरवात केली. ताणे आनी डेव्हन कॉनवेन पयल्या 4 ओव्हरींत पंगडाच्या नांवान 25 धांवड्यो लायल्यो. मात 42 धांवड्यांचेर कॉनवेच्या रुपांन तांची पयली विकेट पडली. अॅ़डम झाम्पाच्या बॉलार संदीप शर्मान ताची कॅच घेतली. कॉनवे 16 बॉलांत फकत 8 धांवड्यो करपाक शकलो. सात ओव्हरींत चेन्नयचो अर्द शेंकडो जालो. झाम्पाच्या बॉलार सको मारपाच्या यत्नात गायकवाडान पड्डिकलाच्या हातांत कॅच दिली. ताणे 29 बॉलांत 5 चौके आनी एका सक्यान 47 धांवड्यो केल्यो. गायवाडा उपरांत अजिंक्य रहाणेक (15) आर आश्विनान सव्वे फावट आवट केलो. उपरांत आश्विनान अंबाती रायडूक (0) कॅच आवट करून 4 आवट 73 अशी करून राजस्थानाक जैताच्या मार्गार हाडलें. ह्या वेळार शिवम दुबे आनी मोईन खान ही पांचवी जोडी जमली मात झाम्पान ही जोडी फोडली. 12 बॉलांत 2 सके आनी 2 चौक्यांनी 23 धांवड्यो करपी मोईन अलीक ताणे विकेटी फाटल्यान सॅमसनाक कॅच दिवपाक लायली. ह्या वेळार चैन्नयक 30 बॉलांत ब जैता खातीर 87 धांवड्यो जाय आशिल्ल्यो. शिवम दुबेन 29 बॉलांत 4 सके आनी 2 चौक्यान आपलो अर्द शेंकडो पुराय केलो मात रवींद्र जडेजाक घेवन तो चेन्नयक जैत मेळोवन दिवपाक शकलो ना. शिवम दुबे निमणे ओव्हरीच्या निमाण्या बॉलार कुलदीप यादवाच्या बॉलार बटलराक कॅच दिवन आवट जालो. तांचो डाव 20 ओव्हरींत 6 आवट 170 धांवड्यांत सोपलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
