भांगरभूंय | प्रतिनिधी
जशें नव्यान लग्न जाल्ल्यांक संवसारात एकठांय हाडटना आवय- बापूय लग्नापयलींची तयारी शिस्तबद्ध रितीन करतात, तशें लग्न सुवाळ्या पयलीं रावपा खातीर घर, गरजेचो वस्तू जमयले उपरांतूच चलो आनी चलयेचें लग्न करतात. गरजेच्यो वस्तू मेळ्ळे उपरांत नवें लग्न जाल्लें जोडपें एकठांय येवन संवसाराक खोशी करतात. हातूंत म्हत्वाची भुमिका योग्य नियोजनान केल्ली आसता. हेच तरेन उदरगतीचें नियोजन म्हत्वाचे आसा अशें मत पेडणे
तालुका उदरगत समितीचे अध्यक्ष व्यंकटेश नायक हांणी उक्तायलें.
पेडणे तालुक्यांत मोपा आंतरराष्ट्रीय विमानतळ, आयुष हॉस्पिटल, पेडण्यांतले केरी, आश्वे, मांद्रे, मोरजी हांगासल्लीं दर्यादेगेर वेवसाय करपी वेपारी आस्थापनां, गांवांनी रावपी आनी गांवांतले ल्हान- व्हड वेवसाय आनी घरगुती वापरा खातीर वीज वापरपी विजेची मागणी आशिल्लें विभाग आसात. पेडणें आनी तुये उप वीज केंद्रांचेर भार उणो करपाक मांद्रे आनी मोपा विमानतळ वाठारा खातीर आनीक दोन उप केंद्रां उपलब्ध करप ही काळाची गरज, अशें मत व्यंकटेश नायक हांणी उक्तायलें.
वीज पुरवण थिवींतल्यान
पेडणें आनी तुयां आशिल्ल्या ह्या दोन वीज केंद्रांक थिवींतल्यान वीज मेळटा. ह्या दोनूय केंद्रा वयल्यान मागीर त्या- त्या केद्रांतल्यान गिरायका कडेन वता. पेडणे तालुक्यांत पेडणें आनी तुये हीं दोन उपकेंद्रां वीज गिरायकांचो भार घेवंक शकनात, देखून मांद्रे, मोपा विमानतळ आनी आयुष हॉस्पिटल हांचे खातीर दोन नवीं उपकेंद्रां सरकार आनी वीज खात्यान बांदून पेडणें आनी तुये गांवांचेर येवपी वजें उणें करचें. विजेची मागणी चड आशिल्ल्यान पेडणें आनी तुये उपकेंद्रांक फावो तितली वीज पुरवण जायना. हाचे खातीर ह्या केद्रांचेर आशिल्ल्या अधिकाऱ्यांक दोश दिवंक फावना. अधिकारी कार्यक्षम आसात. लोकप्रतिनिधी, नगरपालिका, ग्रामपंचायतीन तांच्या वावराक आदार दिवचो. लोकप्रतिनिधींनी वीज, उदक, रस्ते आदी मुळाव्यो भौशीक समस्या सोडोवपा खातीर ह्या खात्याच्या अधिकाऱ्यांनी तयार केल्ले प्रस्ताव सरकारा मुखार सादर करुन पास करुन घेवचे.
लायट कित्याक वता?
विजेची मागणी चड आनी पुरवण उणी आशिल्ल्यान वीज खात्याक गिरायकांक वीज दितना कांय वेळार लोड शेडींग करचें पडटा आनी ह्या सर्किटांत कांय वरां वीज बंद जावप सभावीक आसा. ते भायर हेर जायतीं कारणां आसात. तिय तितलींच म्हत्वाचीं. वारंवार येवपी तंत्रीक आडमेळ्यांचें गिरायकांक संवयचें जालां. एकदां तंत्रीक कारणांक लागून वीज पुरवण बंद जाल्यार फुडलीं दोन-तीन वरां वीज पुरवण जावप शक्य ना असो अदमास गिरायकांक
आयिल्लो आसता. आयज लेगीत तंत्रीक अपेसाक लागून वीज पुरवण बंद जाल्यार वरांचीं वरां वाट पळोवची पडटा आनी आयज लेगीत अधिकाऱ्यांचो आनी कामगारांचो बरोच वेळ तंत्रीक बिघाड खंय जाला तें सोदून काडपाक वता. बिघाड कळ्ळे उपरांत थंय वचून तो सारको करता म्हणसर अधिकाऱ्यांक कांय वरां लागता. वारंवार वीज वचपाचें आनीक एक कारण म्हळ्यार ओव्हर हेड आशिल्ले वीज खांबे आनी विद्युत् वाहिनी ही 50 ते 55 वर्सां पोरणी आसा. कांय वाठारांनी विद्युत् वाहिनी (अॅल्युमिनियम वायर) जरी बदलेली आसली तरी ती उण्या प्रमाणांत आसा. नाल्लाचें
चुडत हें सगळेच कडेन पडटा. पावस, वादळ वा हेर सैमीक संकश्टां वेळार झाडां पडटात आनी विजेची सरी तुटून शॉर्ट सर्किट जाता आनी वीज पुरवण बंद जाता. अश्यो घडणुकी सामान्यपणान घडटात. पन्नास, साठ वर्सां सावन वीज खांबे आनी वीज सरयांचें आयुश्य उणें जालां. कावळो बसलो आनी खांदो मोडलो अशी परिस्थिती आयचे वीज खांबे आनी वीज सरयो पळयल्यार दिसून येता. हें बदलप गरजेचें आसा पूण ते म्हारगय आसा.
जमनीपोंदातल्यान वीज
थिवी केंद्रांतल्यान तुये आनी पेडणें उप केंद्रां मेरेनचो वीज प्रवाह वयर उल्लेख केल्ल्या कारणांक लागून खंडीत जाता तेन्ना जमनी पोंदांतल्यान वीज दिवप हो एकच उपाय उरला. वीज खात्यानय ते बाबतींत काम केलां. थिवी ते तुये मेरेन जमनीपोंदा केबल घातल्यां. तुये सावन पेडणें वीज केंद्रा मेरेन केबल घालपाचें कामूय वीज खात्यान झुजाच्या पांवड्यार सुरू केलां, पूण पेडणें नगरपालिकेच्या सहकार्याक लागून काम तशेंच उरलां.
पेडणें पालिकेन सहकार्य दिवचें….
पेडणें नगरपालिकेन भौसीक हिता खातीर समंजस भुमिका घेवन वीज खात्याक काम करपाक ‘हरकत ना’ प्रमाणपत्र दिल्यार तुये हांगा नगरपालिकेच्या मर्यादेत प्रवेश करुन ते नानेरवाडा हांगाच्या वीज केंद्राक जमनी पोंदातल्यान वीज केबल घालपा खातीर अनुमती दिल्यार वीज खातें पावस सोंपताच म्हणसर पेडणें वीज केंद्राक जमनी पोंदा वीज केबल घालून दिवाळे मेरेन तंत्रीक अपेशीपणाक लागून वीज खंडीत जावप समस्येतल्यांन पेडणेकारांक सुटका मेळटली.
पेडणे उदरगत समितीची तयारी…
पेडणें तालुको उदरगत समितीन वरिश्ठ अधिकाऱ्यां कडेन चवकशी केली तेन्ना जमनी पोंदा वीज केबल घालतना रस्ते खणले खरें पूण ते वीज खातें स्वताच्या खर्चान काम पुराय करतलें आनी रस्ते परतून बांदतलें. ही म्हायती व्यंकटेश नायक हांणी दिल्या. हेर शारांनी वीज खात्यानय हीच पद्दत आपणायल्या आनी हेर नगरपालिकांनी वा पंचायतींनी ह्या कामा खातीर कसलीच अट वा लुकसाण भरपाय मागीनासतना वीज खात्याक हरकत ना अशें प्रमाणपत्र दिवन नागरिकांक बरी सुविधा दिवपाक प्राधान्य दिलां. पेडणें पालिकेक वीज खात्या कडल्यान अर्थीक भरपाय मेळपाची आसल्यार काम सुरू करपाक परवानगी दिवंक शकता. सरकारी काम म्हणल्यार स म्हयने वाट पळोवप अशी एक म्हण आसा. वीज खातें बेगोबेग निर्णय घेवन नगरपालिकेक पयशे दिवंक मेळनात. पूण उपक्रम दस्तावेज होच पुरावो. थंय फटवणूक ना पूण तंत्रीक कारणांक लागून आडायल्या लोकांकच त्रास सोंसचे पडटात. पेडणे नगरपालिकेन नगरपालिका आंवाठा भितरले वेवसायीक आनी जनतेची आनी त्याच वेळार पेडणे तालुक्यांतल्या हेर पंचायतींच्या सगळ्या रहिवाशांचें आनी वेवसायिकांचो विचार करून पेडणें नगराध्यक्ष शेणवी देसाय आनी ताच्या वांगड्यांनी वीज खात्याचें उपक्रम पत्र घेवन तुये सावन नानेरवाडा आनी मालपे मेरेन जमनीपोंदातल्यान वीज केबल घालपाची अनुमती दिवन आपुण खरेंच भौशीक समस्यांचे निवारण करता अशी भावना सार्थ करुंक जाय आनी पेडणेंचे आमदार प्रवीण आर्लेकार आनी जीत आरोलकार हांणी लक्ष घालुन हें जमनी पोंदा केबल घालपाचें कामाक कळाव जाल्लो तें सुरु करताना मांद्रे आनी मोपा विमानतळ आनी आयुष्य हॉस्पिटल अशी दोन वीज केंद्रां सरकार कडल्यान घेवन वीज वचपाचे समस्येतल्यांन पेडणेकरांची सदां खातीर सुटका करची अशी मागणी पेडणे तालुका उदरगत समितीचे अध्यक्ष व्यंकटेश नायक हांणी केली.
निवृत्ती शिरोडकार
9850175509
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
