भांगरभूंय | प्रतिनिधी
अॅड. कार्लुस फेरेराः थळावे लोक, अधिकाऱ्यांचे जोडबसकेंत उतर
भांगरभूंय । प्रतिनिधी
म्हापशें: कामरखाजन, म्हापशेंच्या घाणयाऱ्या उदकाचेर प्रक्रिया करपी प्रकल्पाचे (सिव्हरेज प्लांट) चांचणीक लागून थळाव्या बायांतल्या उदकाची पातळी अचकीत देंविल्ली. गोंयच्या मुख्य सचिवा वांगडा जोडबसका घेवन हे संबंदांत उपाय काडटले, अशें उतर आमदार अॅड. कार्लुस फेरेरा हांणी जोडबसकेंत कामरखाजनांतल्या लोकांक दिलें.
आमदार अॅड. फेरेरा हांच्या फुडारपणा खाला कामरखाजन वाठारांत म्हापशेंच्या घाणयाऱ्या उदकाचेर प्रक्रिया करपी प्रकल्पांत बिरेस्तरा जोडबसका जाली. ह्या वेळार नगरसेवक विकास आरोलकार, प्रकल्पाचे सहाय्यक अभियंते शैलेंद्र वायंगणकार, तांत्रीक अभियंते विशाल पाटील, कनिश्ठ अभियंते व्हिटोरी डिसोधा, थळावे स्टेनली ब्रागांझा, एरॉन गोम्स, नारायण नायक, जॉन लोबो आनी हेर नागरीक हाजीर आशिल्ले.
घाणयाऱ्या उदकाचेर प्रक्रिया करपी प्रकल्पाच्या चेंबर्सांतल्यो आडखळी पयस करचे खातीर कांय दिसां आदीं चांचणी घेतिल्ली. ताका लागून जमनी पोंदच्या उदकाची पातळी अचकीत देंविल्ली. हाचो परिणाम म्हणल्यार कामरखाजन वाठारांतल्यो वांयो आनी झरे आटिल्ले. हे विशीं थळाव्या लोकांनी आवाज काडून चांचणीचें काम बंद उडयिल्लें. तशेंच आमदार अॅड. फेरेरा हांच्या कानार हो प्रकार घातिल्लो. ते प्रमाण बिरेस्तारा प्रकल्पाचे अधिकारी तशेंच थळाव्या लोकां वांगडा आमदारान जोडबसका घेतली. ह्या वेळार सहाय्यक अभियंते शैलेश वायंगणकार हांणी म्हायती दितना सांगलें, कामरखाजनांतल्या कांय चेंबर्सांक गळटी लागपाची शक्यताय आसा. थंयच्या सगळ्या चेंबर्सांची तपासणी करतले. हें दुरुस्तीकाम पुराय जाय मेरेन चांचणी वा फुडलें काम सुरू करचे नात. मे अखेर मेरेन सगळ्या चेंबर्सांतल्यो आडखळी पयस करपाचो आमचो यत्न आसतलो. तशेंच जमनी पोंदच्या उदकाची पातळी कित्याक देंवली हाचोय अभ्यास करतले, अशें तांणी सांगलें.
मुख्य सचिवां वांगडा घेतले जोडबसकाः आमदार
एसटीपी प्रकल्पाचो डीपीआर मागयतले. तशेंच प्रकल्पाच्या पायपलायनींची हायड्रोस्टॅटीक चांचणी जाल्या काय ना ताचीय म्हायती घेतले. पायपलायनींक गळटी लागल्यार फुडारांत उदकाचो स्त्रोत दुशीत जावपाक शकता. तातूंत धामीचीं दुयेंसां पातळल्यार लोकांची भलायकी इबाडटली. गोंयच्या मुख्य सचिवां कडेन हो विशय मांडून संबंदीत सगळी प्रशासकीय यंत्रणा आनी अधिकाऱ्यांची जोडबसका घेवन प्रकल्पाच्या कामाच्या नियोजना विशीं चर्चा करतले. ते भायर सगळ्या सरकारी यंत्रणांनी उदरगतीच्या कामां वेळार एकाच वेळार रस्ते खणपा संबंदांत मुख्य सचिवाक निर्देश दिवपाची विनवणी करतले, अशी म्हायती अॅड. कार्लुस फेरेरा हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
