भांगरभूंय | प्रतिनिधी
कोलकाता नायट रायडर्सान अंदूंचे इंडियन प्रिमियर लिगेंत (आयपीएल) तिसऱ्या जैताची नोंद केली. हांगाच्या एम चिन्नास्वामी स्टेडियमाचेर जाल्ले मॅचींत ताणें येजमान रॉयल चॅलेंजर्स बंगळुरूक 21 धांवड्यांनी हारयलो.
ह्या जैता उपरांत कोलकाता नायट रायडर्सान प्ले ऑफांत सुवात मेळोवपाची आपली आस्त कायम राखली. स गुणां सयत कोलकाता सातवे सुवातेर आसा. जाल्यार बंगळुरू आठ गुणां सयत पांचवे सुवातेर आसा.
कोलकातान दिल्ले 201 धांवड्यांचे मोखीचो फाटलाव करपी बंगळुरूक 8 विकेटी वगडावन 179 धांवड्यो करप शक्य जाल्यो.
ते पयलीं प्ले ऑफाचे सर्तींत कायम रावपा खातीर धडपडपी कोलकाता नायट रायडर्साक जेसन रॉय आनी एन जगदिशन हांणी बरी सुरवात करून दिली. रॉयल चॅलेंजर्स बंगळुरूच्या खेळगड्यांनी फिल्डिगेंत केल्ल्यो चुकी लेगीत कोलकाता नायट रायडर्साच्या पथ्याचेर पडल्यो. मुखेली नितीश राणाच्यो तीन कॅची बंगळुरूच्या फिल्डरांनी सोडल्यो. हाचो बरे तरेन फायदो घेतना नितीश राणान 20 बॉलांनी 48 धांवड्यो केल्यो. वनिंदू हसरंगान 18वे ओव्हरींत दोन म्हत्वाच्यो विकेटी घेत बंगळुरूक पुनरागमन करून दिलें. तरी आसतना कोलकातान मोठी धांवसंख्या उबारलीच.
जेसन आनी जगदिशन हांणी पावर प्लेंत 66 धांवड्यो केल्यो. जेसनान सवे ओव्हरींत शाहबाज अहमदाक चार सके मारले. जेसनान 22 बॉलांनी अर्द शेंकडो पुर्ण केलो. वैशाख विजय कुमाराचे बॉलिंगेचेर सको मारपाच्या यत्नांत जगदिशन (27) कॅच बाद जालो. कोलकाताक 83 धांवड्यांचेर पयलो धपको बसलो. तेच ओव्हरीच्या निमाण्या बॉलाचेर वैशाखान जेसनाक बोल्ड केलो. जेसनान 29 बॉलांनी चार चवके आनी पांच सक्यांचे मजतीन 56 धांवड्यो केल्यो. बाद जावचे पयलीं जेसनान कोलकाता खातीर बरो सेट अप करून दिलो. वैशाखाचे तिसरे ओव्हरींत मोहम्मद सिराजान नितीश राणाची सोंपी कॅच सोडली.
नितीशाक परतून एकदा जीवनदान मेळ्ळें आनी हे खेपे सिराजाच्या बॉलाचेर हर्षल पटेलान कॅच सोडली. नितीशाक जीवनदान दिवप बंगळुरूक म्हारग पडलें. ताणें 16वे ओव्हरींत दोन सके मारून कोलकाताची धांवसंख्या 150 मेरेन व्हेली.
वैशाखाचे चवथे ओव्हरींत नितीशान 17 धांवड्यो केल्यो. वैशाखान चार ओव्हरींनी 41 धांवड्यो दिवन 2 विकेटी घेतल्यो. वनिंदून बंगळुरूक मोठे येस मेळोवन दिलें. तामें नितीशाक बाद केलो.
तेच ओव्हरींत दुसरो सेट बॅट्समन वेंकटेश अय्यर (31) बाद जालो. वनिंदून 24 धांवड्यो दिवन 2 विकेटी घेतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
