मुंबय इंडियन्साची हार

भांगरभूंय | प्रतिनिधी

गुजरात टायटन्सान घरच्या मैदानाचेर खेळटना 55 धांवड्यांनी झणझणीत जैत जोडलें. 208 धांवड्यांचो फाटलाव करतना पांच खेपेचो वस्ताद मुंबय इंडियन्साक खरस मारली. राशिद खान आनी नूर अहमद ह्या अफगाणिस्तानाच्या स्पिनरांनी मुंबय इंडियन्साच्या बॅट्समनांक आपल्या तालाचेर नाचयले. ह्या दोगांयनी 64 धांवड्यांनी पांच बॅट्समनांक बाद करून गुजराताचें जैत निश्चीत केलें.

208 धांवड्यांचो फाटलाव करपी मुंबय इंडियन्साक 20 ओव्हरींनी 9 विकेटी वगडावन 152 धांवड्यो करप शक्य जाल्यो.

ते आदीं मुंबय इंडियन्सान टॉस जिखून पयलीं बॉलिंग करपाचो निर्णय घेतलो. अर्जुन तेंडुलकरान मुखेली रोहित शर्मान दाखयिल्लो विस्वास खरो थारयलो. अर्जुनान पयले ओव्हरींत चार धांवड्यो दिल्यो. अर्जुनान आपले दुसरे ओव्हरींत वृद्धिमान साहाक बाद केलो. दावे वटेन वचपी बॉल मारपाच्या यत्नांत साहा चुकलो आनी बॅटाचे धारेक लागून बॉल विकेटकीपर इशान किशनाच्या हातांत गेलो. साहान डीआरएस घेतलो पूण, ताचो निर्णय चुकलो.

शुभमन गिलान दुसरे वटेच्यान बरी बॅटींग करतालो. ताणें कॅमेरुन ग्रिनाचे ओव्हरींत दोन चवके आनी एक सको मारलो. पावर प्लेंत गुजरात टायटन्सान 1 विकेट वगडावन 50 धांवड्यो केल्ल्यो.

सातवे ओव्हरींत पियुष चावला बॉलिंगेक आयलो आनी ताच्या पयल्याच बॉलाचेर मोठो फटको मारपाच्या यत्नांत हार्दिक पांड्या (13) कॅच बाद जालो. सुर्यकुमार यादवान शिमे लागसार ताची अचूक कॅच धरली.

शुभमन गिलान एक बाजू सांबाळटना 30 बॉलांनी अर्द शेंकडो मारलो. गुजरात टायटन्सान 10 ओव्हरींनी 2 विकेटी वगडावन 84 धांवड्यो केल्यो. 12वे ओव्हरींत कुमार कार्तिकेयचे बॉलिंगेचेर आक्रमक शॉर्ट मारपाच्या यत्नांत शुभमन कॅच बाद जालो. ताणें 34 बॉलांनी सात चवके आनी एक सक्याचे मजतीन 56 धांवड्यो केल्यो. पियुषान परत एकदा फ्लायटेड बॉल घालून विजय शंकराक फटको मारपाक लायलो आनी ताच्या जाळांत तो घुस्पलो. टीम डॅव्हिडान काची कॅच धरली. शंकरान 19 धांवड्यो केल्यो. कार्तिकेयनान 39 धांवड्यो दिवन 1 विकेट घेतली. अभिनव मनोहरान पियुषाचे चवथे ओव्हरींत 17 धांवड्यो केल्यो. पियुषान 4 ओव्हरींनी 34 धांवड्यो दिवन 2 विकेटी घेतल्यो.

अभिनव आनी डॅव्हिड मिलर हांणी पांचवे विकेटी खातीर सकारात्मक भागिदारी करून गुजराताची धांवगती वाडयली. दोगांयनी 30 बॉलांनी अर्द शेंकड्याची भागिदारी पुर्ण केली. ग्रिनान घाल्ले 18वे ओव्हरींत ह्या दोगांयनी 22 धांवड्यो केल्यो.

मिलेरान टी-20 क्रिकेटींत 9500 धांवड्यांचो टप्पो हुपलो. 19वे ओव्हरींत मेरेडिथान ही जोडी फोडली. अभिनवान 21 बॉलांनी 42 धांवड्यो केल्यो. तेच ओव्हरींत बेहरेनडॉर्फान शिमे लागसार मिलराची कॅच सोडली आनी गुजराताक सको मेळ्ळो. मेरेडिथान 4 ओव्हरींनी 49 धांवड्यो दिवन एक विकेट घेतली. ग्रिनान दोन ओव्हरींनी 39 धांवड्यो दिल्यो.

20वे ओव्हरींत राहुल तेवतियान सेगीत दोन बॉलांचेर दोन सके मारून गुजराताची धांवसंख्या दोनशेंच्या मुखार व्हेली. मिलरान 22 बॉलांनी 2 चवके आनी चार सके मारून 46 धांवड्यो करून बाद जालो. तेवतियान पांच बॉलांनी तीन सक्यांचे मजतीन 20 धांवड्यो करून नाबाद रावलो. गुजरातान 6 विकेटी वगडावन 207 धांवड्यो केल्यो.