भांगरभूंय | प्रतिनिधी
भांगरभूंय । प्रतिनिधी
बेळगांवः केएलई डॉ प्रभाकर कोरे हॉस्पिटलाच्या आवाठांत आशिल्ल्या केएल कॅन्सर हॉस्पिटलांतल्या रेडिओ ऑन्कोलॉजी युनिटाचें उक्तावण केल्ल्यान उत्तर कन्नड आनी गोंयांतल्या कॅन्सर दुयेंतीक उपचार करपाक आतां थाकाय मेळपाक शकतली. बसव जंयती निमतान केएलई सोसायटीचो अध्यक्ष डॉ प्रभाकर कोरे हांचे हस्तुकीं ह्या युनिटाचें उक्तावण जालें.
बरोच तेप वाट पळयल्या उपरांत रेडिओ ऑन्कोलॉजी युनिटाचें उक्तावण जावंन शस्त्रक्रिया करपाक सुरू जाल्ल्यान कॅन्सर दुयेंतीक थाकाय मेळटली अशें डॉ कोरे हांणी ह्या वेळार सांगलें. एसआरएस कोन्स, मोबियुश 3डी व्हेलोसिटी आनी प्रिमीयम, हायपरएआरसी ट्यूबीम ह्या अत्याधुनीक उपकरणांक लागून संवसारीक दर्जाची रेडिओ उपचार पद्दती लोकांक मेळटली अशें वेवस्थापकीय संचालक आनी सीईओ डॉ एम व्ही जली हांणे सांगलें.
व्यापक तपासणी खातीर पीटीडब्ल्यूच्या बीमलायन आनी डोसिमेट्री उपकरणांत एकत्रीत लेसर आनी 192 स्लाइसांची प्रगत खाशेलपणां, दक्षिण भारतांत पयलें आयसीबीसीटी हल्कायॉन एलिट मशीन आनी गोंय आनी कर्नाटक राज्यांतलें हें पयलेंच वाइड बोर सीटी सिमुलेटर आसा अशें तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
