भांगरभूंय | प्रतिनिधी
दुर्घटना ही सांगून जायना. ती जातली हेंय जायते खेपे कळना. ताका लागून कांय जाग्यांचेर प्रत्येकान सादूर रावपाक जाय. लायट, उजो, उदका कडेन आबूजपणा, अजागळपणा, खेळ उपकारनात. पेडणें म्हालांतल्या केरी गांवांत आयतारा जें जालें, तें सगल्यांक हालोवन सोडपी आशिल्लें. चार भुरग्यांक सेल्फी घेवपाचे भिरकेंत स्वताचो जीव वगडावचो पडलो. सगलीं 12 ते २४ वर्सां भितरले पिरायेचीं. हे पिरायेंत शिकपाचें, खेळपाचें, खोशेन नाचपाचें. पूण, एक खीण तांच्या जिवितांत असो आयलो…. आनी तांकां सांसणाचो घेवन गेलो. गोंयकार तरणाट्यांनी, पर्यटकांनी हे दुर्घटने पसून धडो घेवपाक जाय. धोक्याच्या जाग्यार बळयां गेल्यार स्वता ‘धोक्यां’त पडपाक शकता, हें तांणी घट गाठीक बांदून दवरपाक जाय. खिणाची मजा, जीणभराची सजा जावं शकता.
23 पर्यटकांचो हो पंगड गोंयांत आयिल्लो. केरी दर्या वेळेर गेल्ले कडेन भितरले कांय भुरगे दर्या वांगडा स्वताचो सेल्फी घेवपाक खडपांनी देंवले आनी ल्हारा सरशीं दर्यांत ओडले. चवगांकूय मरण आयलें, तर तांकां वांटावक गेल्लो जखमी जाला. आजोबा देवळा फाटल्यान हीं खडपां आसात. थंय ‘प्रवेश ना’ असो तक्टो लायला. पर्यटकांक राखपाक दवरिल्ले ‘दृश्टी’ चे जीवरक्षक अदीमदीं आड्डून अमूक जाग्याचेर वचूं नाकात, अशी आनी हेर बऱ्योच शिटकावण्यो दितात. मात, तांचें आयकूपाचें भान कोणाक नासता. दर्या पळयलो काय तरणाट्यांच्या, भुरग्यांच्या कानांत वारें भरता आनी मागीर तीं कितें करतात, तें तांकांच खबर नासता. हीं चार भुरगीं सेल्फी काडपाक धोक्याच्या जाग्यार गेल्यांत तें कोणेतरी पळयलां आसतलेंच. तांणी तांकां आडावंक जाय आसलीं. ह्या भुरग्यां वांगडां कोणूच जापसालदार मनीस नासलो? त्या भुरग्यांकूय कितें जावं येता, हाची शिटूकसाण नासतली. नाजाल्यार दर्यांतल्या वा दर्याक तेंकून आशिल्ल्या खडपांचेर सहसा कोण वचनात. कारण दर मिनटाक व्हडलीं ल्हारां तांचेर आपटून फुट्टात. हाचे पयलीं वागातोरा आनी हेर वेळांचेर खडपांचेर बशिल्ल्या पर्यटकांक ल्हारांनी ओडून व्हेल्यांत. केरी दर्यावेळेर ही दुर्घटना घडली, तेन्ना थंय जीवरक्षक आशिल्ले. तांणी उपचार केले, पूण एकूण प्रकरणूच गंभीर आशिल्ल्यान ते तांकां वाटावपाक शकले नात. काल सोमारा बेपत्ता आशिल्ल्यो दोन कुडी मेळ्ळ्यात.
हरशी म्हूण कोणेय दर्यावेळांचेर येतकच पिवपाकूच जाय आनी न्हांवपाकूय जाय असो नेम ना. पूण चडशे पर्यटकांक हें केले बगर सुशेग मेळना. तक्टे पळोवन, घोशणा आयकूनय ताचे कडेन आडनदर करपी शेंकड्यांनी पर्यटक आसात. ते मस्ती करतात आनी मागीर दर्याचे भेटेक वतात. जीवरक्षक तांकां समजावपाचो यत्न करतात, पूण कांय जाण आयकनात, थोडे आयकुपाचे मनस्थितींत नासतात. जीवरक्षकांच्या आंगार वचपाचे पसून प्रसंग घडल्यात. पर्यटक चोंब्यान आयिल्ले आसतात, एकलो जीवरक्षक पळयलो काय तांकां मागीर नेट चडटा. तो सांगता तें आमच्या बऱ्या खातीर हें तांकां पटना. हाचे मुखार अशा बेफिकीर, बेशिस्त पर्यटकांक ख्यास्त दिवपाची तरतूद करची. आसल्यार ती चालीक लावची. थंयचे थंय तालांव दिले बगर पर्यटक सुदारचे नात. चडूच मस्ती करता जाल्यार ताका बंदखण पळोवपाक धाडचो. दर्यावेळांचेर पुलीस गस्त वाडोवपाची गरज आसा. बाबा, पुता करून कोण आयकना जाल्यार xxx चेर दांडो मारले बगर पर्याय ना. गोंयांत येतात जाल्यार हांगाचे कायदे तांकां (आनी गोंयकारांकूय) पाळचेच पडटले. शक्य आसा जाल्यार पर्यटन थळां वयल्या धोक्याच्या जाग्यांचेर वचपाची वाटूच बंद करची.
पर्यटकांचे सुरक्षे खातीर सरकार लाखांनी रुपया मोडटा. ताका लागून असल्यो व्हडल्यो दुर्घटना जावप समा न्हय. जीवरक्षकांचेर व्हडली जापसालदारकी आसा. ते कामूय करतात. पर्यटकांनीय शिस्तीन वागपाक जाय. मुखार धोको दिसता, तक्टो दिसता, जीवरक्षकूय सांगता…. तरीय पर्यटकांचो मेंदू ताचे कुडीक ह्यो सुचोवण्यो दिना, ती संमोहीत जाल्ले वरीं मुखार वतात आनी स्वता वांगडा कुटुंबाकूय जीणभर त्रासांत उडयतात. भुरग्यांक मोबायलाचें पिशें लागलां, पालकांनी तें उणें करपाक फावो. नाजाल्यार दुर्घटना जायत रावतल्यो आनी आमी आमचे भुरगे, तरणाटे वगडायत रावतले. कितें तरी करपाक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
