भांगरभूंय | प्रतिनिधी
मार्च ते जून मेरेन तीन ते चार म्हयन्यांच्या काळांत उश्णतायेचें प्रमाण वाडटा. अंदुं वातावरण चड गरम जातलें, अशें म्हणटात. दिसाचे भायर भोंवतना कुडीचेर सुर्याचें खर वत पडपा पसून टाळपाक चडशे लोक समर स्किनकेअरचो उपेग करतात. गिमाच्या दिसांनी सुर्याच्या वताचे तिव्रतेची बादा जाण्ट्यां परस भुरग्यांच्या आंगाचेर चड जाता. ह्या काळांत ल्हान भुरग्यांक काती संबंदीत दुयेंस जावपाची चड शक्यताय आसता. अशे स्थितींत तांकां निर्जलीकरण, उश्माघात येवं येता. गिमात भुरग्यांची जतनाय घेवपाक बेबी केअर टिप्स वापरूं येतात. तर ह्या साद्या पूण म्हत्वाच्या मुद्द्यां विशीं जाणून घेवया..
दूद सगळ्यांत बरो आहार
गिमाच्या दिसांनी कुडीत उदकाचें प्रमाण कमी आसप सामान्य आसा. पूण हें प्रमाण चड उणें आसल्यार दुयेंत पडपाची शक्यताय आसता. गिमाच्या दिसांनी निर्जलीकरण जावचें न्हय म्हणून भुरग्यांक उदका सयत आवयचे दूद नेमान दिवचें. अशें केल्यार कुडींत उदक तिगून उरतले आनी दुदांतल्या पोशक तत्वांचो तांकां फायदो जातलो. 6 म्हयन्यां मेरेनच्या भुरग्यांक आवयचें दूद दिवप गरजेचें. हाकां लागून आवय लेगीत हायड्रेटेड उरता अशें म्हण्टात.
घरा भायर व्हरप टाळचें
सकाळीं 10 ते दनपारां 2 ह्या काळांत सुर्याचो चड प्रभाव आसता. ह्या चार वरांत भुरग्यांक सुर्याच्या उजवाडांत व्हरप टाळचें. तांची रोगप्रतिकार शक्त उणी आसता. मागीर उश्णतायेच्या परिणामाक लागून ते दुयेंत पडूं येतात. खूब म्हत्वाच्या कामा खातीर तांकां भायर व्हरचे पडल्यार तांचे पुराय आंग धांपून दवरपाची जतनाय घेवची पडटा. सद्या बाजारांत भुरग्यां खातीर सनस्क्रीन लोशन मेळटा. दोतोराच्या सल्ल्या प्रमाण ताचो वापर करुं येता.
कपडे उणे घालचे
कांय पालक आपल्या भुरग्यांक चड कपडे घालतात. भुरग्यांची कात नाजूक आसता. उश्ण गिमाच्या दिसांनी चड प्रमाणांत कपडे घाल्यार तांकां त्रास जावं येता. अशा वेळार मोव आनी सुती कापडां वापरप फायद्याचें थारता. तशेंच सुती कापडां पसून तयार केल्लें हांतरुण वापरप योग्य मानतात.
भुरग्यांच्या आंगांत घामाच्यो ग्रंथी पुरायपणान तयार जायनात. देखून तांका गरम जाता कांय ना हें सांगप कठीण. ह्या वेळार ताका चिडचिडेपण आयल्यार वा कात कांय प्रमाणांत सुकी जाल्यार तांकां गरमी जाता अशें मानचें. दूद पियेवंक ना वा मुतूंक ना जाल्यार सुर्याच्या उश्णतेचो तांचेर परिणाम जाल्ल्याचें दिसून येता. अशा वेळार तांकां बेगोबेग दोतोरा कडेन व्हरपाक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
