भांगरभूंय | प्रतिनिधी
मुरगांवः मुरगांव मतदारसंघांत मुख्यमंत्री डॉ. प्रमोद सावंत हांच्या 50 व्या वाडदिसा निमतान मुख्यमंत्री डॉ. प्रमोद सावंत हांचें आगळें रांगोळी चित्र, विवीध केक मेकींग सर्त, बायणा दर्यादेग नितळसाण मोहीम, पालिका कर्मचाऱ्यांचो सत्कार, सरकारी शाळेंतल्या विद्यार्थ्यांक गणभेस आनी पुस्तकां भेटयलीं. ह्या विवीध कार्यावळींचें आयोजन आमदार संकल्प आमोणकार हांणी हेडलॅण्ड सडा वाठारांतल्या कार्यालयांत केल्लें.
ह्या वेळार मुरगांवचे भाजपा गटाध्यक्ष संजय सातार्डेकार, नगरसेविका श्रद्धा आमोणकार, मुरगांव मतदारसंघाचे म्हणयारे संतोष केरकार, कुणाली पार्सेकार, प्रसाद प्रभुगांवकार आनी हेर मानेस्त हाजीर आशिल्ले.
आयचो दीस खूब म्हत्वाचो, कारण मुख्यमंत्री डॉ. प्रमोद सावंत हांचो वाडदीस, लयराई देवीची जात्रा, मिलाग्रीस सायबिणीचें फेस्त तशेंच सचीन तेंडुलकार हाचो वाडदीस लेगीत आयच्याच दिसा आसा. असो आगळो संगम जुळून आयला, खऱ्यांनीच आमी भाग्यवान, अशें सांगून मुरगांवचे आमदार संकल्प आमोणकार हांणी मुख्यमंत्री डॉ. सावंत हांकां वाडदिसाच्यो शुभेत्सा दिल्यो. ह्या वेळार आमदार संकल्प आमोणकार आनी हेर मानेस्तांचे हाजिरेंत पालिका कर्मचाऱ्यांचो शाल, नाल्ल आनी यादस्तीक चिन्न दिवन सत्कार केलो. तशेंच सरकारी शाळेंतल्या विद्यार्थ्यांक गणभेस आनी पुस्तकां भेटयलीं. तेचवरी मुख्यमंत्री डॉ. सावंत हांचें आगळें रांगोळी चित्र श्री ईश्वटी ब्राह्मण लक्ष्मी नारायण मंदीर सभाघरांत पितारिल्लें. ती रांगोळी प्रदर्शना खातीर उक्ती दवरिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
