भांगरभूंय | प्रतिनिधी
किशोर कदमः कोंकणी नाटक संगीत अकादमीचें उक्तावण
भांगरभूंय । खबरां मेज
पणजीः आयज सगळीच संस्कृती एक दिसपाक लागल्या. अशा वेळार जागतिकरणाच्या नांवा खाला आमी आमची संस्कृती, भास, अस्मिताय तिगोवचे खातीर यत्न करपाक जाय, अशें नामनेचे मराठी कवी आनी चित्रपट कलाकार किशोर कदम (सौमित्र) हांणी सांगलें.
फोंडेंच्या राजीव गांधी कला मंदिराच्या मास्टर दत्ताराम नाट्य सभाघरांत आयोजीत केल्ल्या कोंकणी नाटक संगीत अकादमीचें उक्तावण केले उपरांत कदम मुखेल सोयरे म्हूण उलयताले.
कोंकणीच्यो विवीध शैली आसल्यो तरीय तांचो स्वतंत्र स्वर आसा. पंडित जितेंद्र अभिषेकी बुवांनी कोंकणी संगिता खातीर दिल्ल्या योगदानाचो उल्लेख करतना तांणी सांगलें, कोंकणी नाटक संगीत अकादमीची स्थापना हें कोंकणी संस्कृती, संगीत, नाटक संवर्धना खातीर उखलिल्लें बरें पावल.
कार्यावळीच्या अध्यक्षस्थानाचेर ज्ञानपीठ जैतिवंत लेखक दामोदर मावजो हाजीर आशिल्ले. कोंकणी नाटक संगीत अकादमीक शुभेत्सा दितना फुडारांत हे अकादमीन सृजनशील उपक्रम हातांत घेवचे, असो तांणी उलो मारलो.
हे कार्यावळींत ज्येश्ठ नाटककार, साहित्यीक उदय भेंब्रे आनी संगीत नाटक अकादमी पुरस्कार फावो जाल्ले नाट्य लेखक पुंडलीक नारायण नायक हांकां अकादमीचें मानद वांगडीपण भेटयलें. तशेंच कोंकणी माचयेर स्त्री कलाकार म्हूण सुरवातीच्या काळांत योगदान दिल्ले सुनिता गावणेंकार आनी माया गवंडळकार हांचो भोवमान केलो.
ह्या वेळार रामदास नायक हांच्या ‘वंदेमातरम्’ पुस्तकाचें प्रकाशन केलें.
मानद वांगडीपण स्विकारले उपरांत पुंडलीक नायक हांणी सांगलें, अकादमी कितल्यो आसात, हे परस त्या अकादमींचो वावर कसो फुडें व्हेलो हाका म्हत्व आसा. कलेच्या मळार काम करतना अकादमीन अशे उपक्रम हातांत घेवचे जे वरवीं गिनीज बूक ऑफ रिकॉर्डांत ताची नोंद जातली.
कोंकणी नाटक संगीत अकादमीचे अध्यक्ष आनी नाट्यकर्मी श्रीधर कामत बांबोळकार हांणी येवकार दिलो आनी प्रास्तावीक केलें. सरकारान थळावी कला आनी संस्कृती जिवीत दवरचे नदरेन कला अकादमीची स्थापना केली. तीच प्रेरणा घेवन ही अकादमी फुडारांत वावर करतली, अशें तांणी सांगलें.
डॉ. जयंती नायक (लोकवेद), डॉ. शकुंतला भरणे (संगीत), वसंत भगवंत सावंत (नाटक) आनी शशिकांत पुनाजी (साहित्य आनी कला प्रयोग सादरीकरण) हांणी फुडल्या वर्सभराच्यो प्रस्तावीत कार्यावळी मांडल्यो.
ह्या वेळार माचयेर अकादमीचे उपाध्यक्ष डॉ. पुर्णानंद च्यारी हाजीर आशिल्ले.
डॉ. रुपा च्यारी आनी शशिकांत पुनाजी हांणी सुत्रसंचालन केलें. गणेश वंदनेन कार्यावळीची सुरवात जाली. अकादमीचे सचीव पंढरीनाथ परब हांणी उपकार मानले.
उक्तावण सुवाळ्या उपरांत जाल्ले कार्यावळींत कटमगाळ दादा पंगडा वतीन लोकनाच, अतिश कारापूर आनी सांगात्यां वतीन भजन, शकुंतला भरणे आनी पुर्णानंद च्यारी हांणी कोंकणी सुगम संगीत, कला चेतना वळवय वतीन नाट्यप्रवेश, श्री शिर्वी प्रासादीक नाट्य मंडळ बोरी वतीन संगीत सौभद्र नाटकांतलो प्रवेश, अंत्रूज लळितक बांदोडें वतीन गे माये नाटकांतलो प्रवेश, कला अकादमी नाट्य म्हाविद्यालया वतीन पिंपळ पेटला नाटकांतलें प्रवेश, गौरी कामत हांणी एकपात्री अशा विवीध कलाप्रकारांचें सादरीकरण जालें. कार्यावळीचें सुत्रनिवेदन प्रसाद पागी, राजेंद्र प्रभू, रजत हेगडे आनी सुरज कोमरपंत हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
