भांगरभूंय | प्रतिनिधी
भांगरभूंय । प्रतिनिधी
मुरगांवः मुरगांव पालिका मंडळाच्या (एमएमसी) आयज (मंगळार) जावपी उपनगराध्यक्षपदाचे वेंचणुके वयल्यान सत्तारूढ भाजप समर्थक नगरसेवकां मदीं बंड जावपाची शक्यताय आसा. हे वेंचणुके खातीर मुरगांवांतल्या रामचंद्र कामत आनी दाबोळीच्यान विनोद किनळेकार ह्या भाजप समर्थकांनी उमेदवारी अर्ज सादर केल्यात.
किनळेकाराक पंचायतमंत्री माविन गुदिन्हो, मुरगांवचो आमदार संकल्प आमोणकार आनी वास्कोचो आमदार कृष्णा (दाजी) साळकार हांचो तेंको आसा रामचंद्र कामत हांणी आपल्या वांगडा 14 नगरसेवक आनी दोन अपक्ष नगरसेवकांचो तेंको आसा असो दावो केला. हे घडणुकेक लागून मुरगांव आनी दाबोळेचे नगरसेवक अशे दोन गट जावपाची शक्यताय आसा.
नवो उपनगराध्यक्ष वेंचून काडपा खातीर मंगळारा सकाळीं 11 वरांचेर पालिका सभाघरांत पालिका मंडळाची खासा बसका जातली. रामचंद्र कामत हे आदले मंत्री मिलिंद नायक हाचे समर्थक आसात. तांणी आपले पांच उमेदवारी अर्ज सादर केल्यात. किनळेकारान दोन अर्ज सादर केल्यात. उपनगराध्यक्षपदा खातीर रामचंद्र कामत हाचे नांव निश्चीत केल्लें. ताची बिनविरोध निवड जातली अशें दिसतालें मात 22 नंबराच्या प्रभागाचो नगरसेवक विनोद किनळेकार अर्ज सादर केल्ल्यान अटितटीची वेंचणूक जावपाक घातल्या.
मुरगांवच्या प्रभाग 7चो नगरसेवक रामचंद्र कामत हाका आदलो मंत्री मिलिंद नायक, वास्कोचो आदलो आमदार कार्लुस आल्मेदा हांच्या समर्थक नगरसेवकांचो तेंको आसा. किनळेकाराक मंत्री माविन आनी संकल्प आमोणकार आनी दाजी साळकाराचो तेंको आसलो तरी 13 नगरसेवकांचें समर्थन मेळोवपाक ताका कुस्तार जातलें अशें सांगतात. उपनगराध्यक्षपदाचे वेंचणुके खातीर मुरगांवचो उपजिल्होधिकारी भगवंत करमली निर्वाचन अधिकारी म्हणून काम पळयतले.
——————————-
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
