गंडभैराव कल्याणम!

भांगरभूंय | प्रतिनिधी

दुर्गा भितर मालका इतलोच सुण्याचोय हक्क आसा, अशें सांगून आनीक सुप्रीम कोर्टाचे निकाल दाखोवन आपलें तेंच खरें केलें आनी ताचें गर्व आनीक वाडलें. (आतां फुडें)
गं डभैरांव सदां उठून वत मोव पडतगेर आपल्याल्या सुण्याक घेऊन पासयेक वतालो, वांगडाच जगावेल्या सुण्याक खावड दिवून तिनसना घरा परततालो, शंख फुकून व्हड आवाज करतालो आनीक वरभर शुभंकरोती कल्याणम म्हणत अखंड जप करतालो. जप करतनाचो तागेलो कणखर पूण घोगरो आवाज सरभोंवतणी, पूर्व, पश्चिम, उत्तर आनी दक्षीण ह्या चारूय दिशांनी कंपना निर्माण करतालो. आयकतल्याकूय एक अप्रतिम भावना निर्माण जाताली. जप कानार पडतगेर आजूबाजून आशिल्ले थोडे भावूक जातालें. जप करताना दक्षीणेक काळोख आसचो न्ही म्हणून ताणें दक्षीणे वटेंन फाट आशिल्ल्या सगळ्या घरां खातीर बिल्डरा फुड्यांत वचून देखभाल निधींतल्यान दुर्गाचेर लायटी घालून घेऊन एक बेस बरें काम केल्लें. दक्षीक आशिल्ल्या वांगड्याचे कल्याणम जाल्ले. ताणें केल्ल्या ह्या अखंड जपाचें फळ म्हणूनच काय कितें आनी एक नवी मालक वांगडी गुलगुलात हिणें ह्याच संकुलांत गंडभैरांवा कुशीन घर घेतले. गुलगुलातुय सुणे आणि जनावर कल्याण करूंक वावुरताली. गुलगुलाताचो खंबीर आधार गंडभैरावाक मेळूंक लागिल्लो! शुभंकरोती कशें जाता वा म्हणटा तें समजलेंना जाल्यार पुसून खंडित गंडभैरांवाचे आनी सुण्याचे कल्याणम निश्चित जावूंक लागिल्लें. अखंड जपाचो येफेद गंडभैरावा फावराद
आयिल्लो.
गंडभैरावाले उरफाटे खोपडीक गुलगुलातान आनीक इल्लिशी कोंर्त दिल्ली. गुलगुलाताच्या साथीनं वेण्णाचेर दोन केशी ताणें घाल्यो, सुण्याचेर गाडी घाली म्हणून ताणें कागाळी करून वेण्णाली गाडी पोस्तार वेली आणिक धा- पंधरा दीस गाडी बंदखणींत उरली. वेण्णाक धांवपळी करच्यो पडल्यो. आदोगाद काड, पावटी घाल, पोस्ताचेर यो वच कर ह्या वेरबा भितर वेण्णाली वाट लागून गेल्ली. आदोगादूय वेण्णाक मोठी बिलां दिवूंक लागिल्लो. वेण्णा कडल्यान आदोगादाले शुभंकरोती आनी कल्याणम दोनूय जावूंक लागिल्ले. वेण्णा हे त्रास काढता ते पोळोवून गंडभैरांव एकदम खुशालभरित जाल्लो. जप आनीक मोठ्यानं म्हणूक लागिल्लो. वेण्णा हातूंतल्यान भायर सरून गाडी सोडोवन हाडटा म्हणसर गंडभैरावाक गेटीभायल्या खळयेंत एक मेल्ले सुणे नदरेक पडलें, तेन्ना ताणें सुण्याचें पोस्टमॉर्टम केलें आनी वेण्णान वीख घालून सुणो मेला असो दुबाव घेवन, आनीक एक केशुय केली. गुलगुलात हातूंत गंडभैरावाक साथ दिताली. एक रावतल्या भाडेकरूंचेरूय ताणें सुण्या विशया वेल्यान केश केली. केशी फाईल करतगेर तागेलो आनंद मळबाक पावतालो. ह्या बोवाळा भितर आशिल्ली ती आमगेली समिती सुणी हुपून मुखार वचपाक पावनाशिल्ली. ह्या दुर्गा भितरले चाळीस एक वांगडी मालक कुशीन उरील्ले आनीक सगळे समितीचे विषय फक्त सुण्या भोंवतणी घुंवत आशिल्ले. प्रत्येक मीटिंगेक गंडभैरांव फक्त सुणे कल्याण आणिक राखण हाजेरूच चर्चा करतालो आनी सुण्याचे राखणेचो थाराव पास करपाच्यो गजाली करतालो. ताचे मुखावेली आनी चर्चा जावूंक पावनाशिल्ली आनी पावला फुडें पडनाशिल्ली.
हे सगळे कमी म्हणून कितें एक वांगडी मालक दुर्गानंद हाणें सगळे नेम कुशीक दवरून घरांत भितर वणत मोडपाक सुरवात केली. गंडभैरावाक कागाळी करपाची खाज आनीक तांतूंत ही चलून आयिल्ली संद. गंडभैरावान येतल्या वतल्याक रेवेंच्यो, खडयेचो राशी, लोखणाचे वारांव, पेंटाचे डब्बे आनीक शिमिटाच्या पोतयेचो दाळ दाखयत बोबो मारल्यो. बिल्डरा कडे कागाळ केली, पूण ताणें कानार केंस काडले. समितीच्या वांगड्यांक अपडेट करीत रावलो. हे काम अनैतिक आशिल्ल्यान समितीच्या बाकीच्या वांगड्यांनीय ताका तेंको दाखयलो. हातूंतल्यान गंडभैरवांक आनीक चेव चडलो आनीक ताणें आपल्यो मर्यादा हुपल्यो. दुर्गानंद भायल्या राज्यात एक व्हड पोलीस एम्प्रेगाद आशिल्लो. तो कामाक भायर आशिल्ल्यान तागेली घरकान्न ह्या कामाची देखरेख करताली. काम चलताना गंडभैरांव घराचे फोटो काढतालो, आनीक चूक घडता म्हूण पेरगाव घालतालो. दुर्गानंदाली घरकान्न दुर्गे चाळवल्ली. गंडभैरांव घरा कुशींतल्यान फोटो काडुंक भितर सरता म्हूण तिने आपले सुरक्षेचो प्रस्न आसा अशे म्हणून घरा कुशीक दुरीग बांदूंक सुरवात केली, गंडभैरावाचेर नियंत्रण दवरूंक आनीक आपल्या सुरक्षेखातीर बाउंसर हाडून दवरले , आनीक पोस्तार वचून केशूय केली. शेराक सव्वाशेर हांगा मेळिल्लो. दुर्गानंदांन गंडभैरावाचेर मात केल्ली. दुर्गे दुर्गट भारी म्हणता तशेच जाल्ले. दुर्गानंदांन आपुन सोडचोना, काशांवांक घाल्यार पुसून भायर सरतोलो हे दाखोवन दिल्ले. आता बिल्डरांकुय दिसले कि हे चडार पडटा म्हूण तांणी दुर्गेक मेळून आणिक दुर्गानंदाकडेन उलोवन पळयलें. पूण काय साधलेंना. आदोगाद येवन दुरीग मोडपाचो यत्न केलो, पूण दुर्गानंदानं आपले तेच खरे केले. दुरीग उभे झाले. गंडभैरांव थोडो काचाबुल जाल्लो. सतर वितर जाल्लो. समितीचो मुखेली गंडभैरांव थंड जाल्लो. फुडें बिल्डर बी ह्या प्रकरणातल्यान पयस रावलो. गंडभैरांव थोडो वेळ हताश जाल्लो. सोसायटी जावपाचे सपन तुर्ताक तरी शेळेल्ले.
गुलगुलातान हीच संद साधून पेटिल्ले शेकोटेंत आपलेय हात शेकोवून घेतले. तापिल्ल्या तव्यार आपली भाकरी भाजून घेतली. सगळ्या वंगड्यांक संकुलाच्या सोबीतकाये विशीं शेरमाव सांगत आपल्या घराचे फाटले वाटेन चार खांबे उबारून पडवी आवांताद वाडोवून साला भितर घेतली. पावसाची पावळी आतां दुर्गाचे भायले वण्टी वेल्यान सरपटत देवूंक लागिल्ली. काश्टी भिजयनासतना थिगुर कशे धरप हाचें एक कार्रेगाद उदाहरण गुलगुलातान घालून दिले. हिंदी चिनी भाई भाई म्हणत गंडभैरवाल्या तोणाक तिनें पानां पुशिल्लीं, शेपडेक उजो पेटायिल्लो. शेठ पडल्यार खंय भट धांवता. भट पडल्यार कोणे धांवचे अशे म्हणटात, तशीचशी परिस्थिती हांगा जाल्ली. गंडभैरांवान कामराक वचून कागाळी करुन कामराध्यक्षाक धोंसलो पूण काय साधलेंना. गंडभैरांव पलटवार करूंक संधीची वाट पळयतालो. ताचे शिवाय तो ह्या वेळार आनीक काय करुंक शकानाशिल्लो. (फुडें चलता)

अजय करमली
93737 46957