भांगरभूंय | प्रतिनिधी
भांगरभूंय । प्रतिनिधी
वास्कोः मुरगांव पालिका इमारतीच्या फाटले वटेन जीसूडा वतीन गटाराचें बांदकाम करतना कांय कडेन फुटपाथा पसून दोन मीटर रस्त्याचेर अतिकमण केल्ल्यान रस्त्याची रुंदी कमी जावन येरादारीची कोयंडी जावपाची भिरांत उक्तयतात. जे सुवातेर दुचाकी पार्क करताले थंय हें गटार बांदतात. फुडाराक दुचाकी खंय पार्क करपाचें हें स्पश्ट जावपाक शकलें ना. मात पयलींच्या गटाराची दुरुस्ती व नूतनीकरण करपाची गरज आसतना ह्या गटारा पसून दोन मीटर अंतराचेर नवे गटार बांदपाचें प्रयोजन कितें असो प्रश्न सध्या वास्कोकार विचारतात
मुरगांव पालिका कार्यालयीन इमारतीचें नूतनीकरणाचें काम निमण्या पांवड्यार पावलां. म्युनिसिपल हायस्कूलाचें नूतनीकरणाचें काम पुराय जाल्ल्यान थंय परत वर्ग सुरू जाल्यात. हेर काम पुराय जाल्ल्यान रोखडेंच थंय कार्यालयाचें कामकाज सुरू जावपाची शक्यताय आसा. इमारतीचें नूतनीकरण करतना कांय बदल केल्यात. पालिका इमारती कडेन जीसूडान जे तरेन गटाराचें बांदकाम चलयलां ते विशीं लोक अजाप उक्तायतात.
हे इमारती भोंवतणी पोर्तुगीज तेपा वयलें गटार आसा. ते खातीर जाय तशें नियोजन केल्ल्यान पावसाचें उदक व्हावंन वतालें. सध्या जीसूडान सरभोंवतणी गटार बांदकाम हातांत घेतलां. इमारतीच्या फाटल्यान आशिल्ल्या गटाराचें बांदकाम करतना पयलींच्या गटाराचे सुवातेर करनास्तना रस्त्यार सुमार दोन मीटर अतिक्रमण करून थंय नवें गटार बांदपाचें काम चल्लां. ताका लागून रस्त्याची रुंदी कमी जाल्या. हे सुवातेर दुचारी पार्क करताले. ते संबंदी प्रस्न उप्रासपाची शक्यतात आसा. त्या गटाराचेर लाद्या घातल्यार हेर वाहनांक आडमेळे येवून अपघाज जावपाची भिरांत आसा. हे संबंदी समाज वावुरपी चंद्रशेखर वस्त हांणी कांय प्रस्न उपस्थीत केल्यात. संबंदितांनी ताचें स्पश्टिकरण दिवपाक जाय अशें कांय लोकांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
