भांगरभूंय | प्रतिनिधी
इक्बाल इलेव्हन पंगडान गोंय क्रिकेट असोसिएशनाच्या (जीसीए) सी डिव्हीजन दक्षीण विभागीय क्रिकेट सर्तीचें वस्तादपण जोडलें. फायनलींत ताणें बॅनरमॅन स्पोर्ट्स क्लबाक हारयलो.
टॉस जिखून बॅनरमॅन स्पोर्ट्स क्लबान पयलीं बॉलींग करपाचो निर्णय घेतलो. इक्बाल पंगडान 40 ओव्हरींनी 8 विकेटी वगडावन 300 धांवड्यो केल्यो. अमर अराकसान 74 बॉलांनी 94, अमेय धामशेंकारान 72 बॉलांनी 81 आनी आदिल अन्सारीन 22 बॉलांनी 34 धांवड्यो केल्यो.
बॅनरमॅना वतीन राजीव शुक्लान 3, परेश आजगांवकारान 2 आनी विनेश सतरकार आनी सागर गावडे हांणी दरेकी एक विकेट घेतली.
मोखीचो फाटलाव करतना बॅनरमॅन क्लबाक 22.1 ओव्हरींनी 121 धांवड्यो करप शक्य जाल्यो. ताच्या विनेश सतरकारान 55 आनी मयुर सुतारान 22 धांवड्यो केल्यो. अतुल वितकर, शमीन आलम आनी पुष्पशील देसाय हांणी दरेकी दोन विकेटी घेतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
