गजानन जोग – गोड गोड यादी

भांगरभूंय | प्रतिनिधी

काल चितेचेर गजाननालें पार्थिव कमकमून पेटिल्ल्या ज्वाळांतल्यान पंचमहाभुतांत विलीन जातालें तेन्ना खूब खूब यादी चित्रफितीसारक्यो सरकल्यो.

काल दनपारां जेवपाक बसतनाच बातमी आयली. गजानन जोग गेलो. म्हाका मित्र कमी. लेखक मित्र तर सामकेच कमी. गजाननालें, ताच्या कुटुंबाचें म्हजे कडेन जुळटालें. खूब वर्सांची इश्टागत ही. गजानन हो प्रतिभावान जालोच, पूण तो brainy म्हळ्यार बुदवंत लेखक. एलएलबीक आसतना एका वर्सा तो वर्गांत पयलो आयिल्लो, अशी हयन्हयशी याद जाता. बोंड्याक प्रस्नपत्रिका आनी जापो बरोवन आदीं दिल्यार लेगीत तो पयलो येवचो ना हें नक्की. गजानन हे बाबतींत आनी हरशींय बी ‘उजवो’.
रूद्र हो ताचो पयलो कथांझेलो. ताका म्हजो काका प्रकाश थळी हांणी अभ्यासपूर्ण प्रस्तावना बरयल्या. कोंकणीतली ही सुंदर प्रस्तावना. “चडशा जाणांचें बरोवप, उलोवप बी अभ्यास- पूर्व, पूण तुजें हें बरप अभ्यासपूर्ण” अशें ताणें काकाक सांगलें आनी आमी स्फोट जाल्लेवरी हांस हांस हांसले.
गजानन विनोदी सभावाचो. म्हाका ताचे विनोद आवडटाले. कारण तो फोडून सांगनासलो. ताच्या कथांतलीं प्रतिकां प्रतिमा लेगीत अशींच. सूचक. पाश्त आनी पातळ भाजी हे ताचे निबंद म्हाका खूब आवडटाले. कोंकणी चळवळींत लळीतक नांवाची एक कार्यावळ आमी करताले. गजानन तातूंत पाश्त वाचून सगळ्यांक पोट फुटसर हांसयतालो. ताच्या गांवांत साकोड्ड्यां लळीतक करपाक वतना आमी ट्रकान लेगीत गेल्यात. हरशीं बसीन, पिकपींनी बी.
गजानन आयताराचो म्हाका मेळपाक आकाशवाणीर येतालो. आमी च्या मारपाक सकयल उडप्यागेर वताले. सॅट डोसा हें प्रकरण ताणेंच म्हाका शिकयलें आनी ताचें वेसन लायलें. हो जिनस म्हळ्यार पोळ्या परस दाट आनी उत्तप्पा परस पातळ. सांबारा वांगडा सामको रूचीक लागता. कोविडा उपरांत खूब तेंप तो जमावांत, गर्देंत गेलोना. फोन करतकच म्हणटालो, ए मुकेश, खूब तेंपाचे सॅट डोसा उरल्यात रे. सकाळीं शुभप्रभात मेसेज धाडटालोच. शुक्रारचो बी महालक्ष्मीची प्रतिमा धाडून पोंदा तुमची ही कुलदेवता अशें बरयतालो. 29 मार्चाक ताचो निमणो मेसेज आयिल्लो. तीन सप्तकां भलायकेच्या समस्यां कडेन झुजत गजाननान निमणो स्वांस घेतलो. घरकान्न सुनेत्राक हो शोक सोसूंक बळगें मेळूं.
चलो स्नेहल, चली स्निग्धा हीं तांचीं जुंवळीं भुरगीं. मुकेशकाका म्हणल्यार तांकां खास कितें तरी. गजाननान फ्लॅट सोडून ताळगांवांच घर बांदलें तेन्ना घरप्रवेशाक भितर सरतनाच लायव्ह जिलब्यो तळप चलिल्लें आनी भितरल्या सालांत साने भावांचें लायव्ह गायन. हें दोनूय जिबेर, कानार उरलें रे अशें म्हणटकच तो हांसलो. ताचे दोळे चमकदार, भेदक. वक्लाच्या खांचींतल्यान सकयल पळेत, विनोद करीत तो मुमुरख्यांनी हांसतालो.
आमी मेळटकच जगांतल्या नाना विशयांचेर उचांबळीत जावन उलयताले. दत्ता नायकाक तोखेताले. तासताले. दखल कोणाची घेवप आनी कितली तें ताका आनी म्हाका बरें कळटालें. जगांतलीं घडिचाराचीं स्पंदनां गजाक कळटालीं. ताचेर तो भाश्य करतालो. शंकर परूळेकार हो कवी वतकच गजाननान सुनापरान्तांत लेख बरयल्लो. ताची वळख घडोवपी. खुबूच सुंदर. शंकराच्या कवितेचेर आमी उलय उलय उलयल्यात. कोंकणी लेखक, तांचें साहित्य, समाजाक त्राशीक जावपी कांय जाणांचें वर्तन ह्या विशयाचेर आमी उलयतालेच. गजानन मिमिक्री बरी करतालो. कोंकणी लेखकांचो भाशणां करतनाचो टिपेचो आवाज तो बरो काडटालो. विनोदी आनी खेळकर सभाव कायम.
एक दीस ताच्या कॅनरा बॅंकेंत हांव गेल्लों. रकाद दिलो. बिझी आशिल्लो. संगणकाचेर. बरें रे, अशें म्हणून परततनाच म्हजो खादी शर्ट ताणें चिमटेंत धरलो आनी एक पोळो सोडलो – “आतां खरो केळेकार कसो आनी कोशकार केळेकार कसो सोबलो. बोटवो फाल्त.” म्हाका खूब वेळ हांसूंक येतालें. एका मित्रान खादी राजस्थानी शर्ट दिल्लो तो हांवें घाल्लो. म्हजे प्रायव्हसी आनी इश्टागतीची माटोळी हे निबंद ताका आवडिल्ले. ताच्यो व्हेरा, रूद्र, क्रुझालो पाय ह्यो कथा क्लास. झबाझब ही कथा कळस, अप्रतीम. ताच्यो कांय कथा हांवें इंग्लीशींत अणकारल्यात. गजाननालें फाटल्या वीस वर्सांतलें साहित्य ताच्या आदल्या साहित्या इतलें सशक्त दिसना.
गजाननाक संगीत आवडटालें, कळटालें. बरें- बरें शास्त्रीय संगीत तो आयकतालो. तो म्हाका धाडटालो. हांव ताका धाडटालों. ताचेर आमी उलयताले. केन्नाय आमी उल्हास पै रायकारा कडेन उलयताले. कारण आनीक कोणा लेखका कडेन संगीत उलोवं येता?
ताणें एके कथेचो take off असो केलो – उजो कमकमून पेटलो. वाचतनाच हांव थांबलो. कितलें सोबीत क्रियाविशेशण कमकमून. गांवगिऱ्या वाठारांतलें. हांवें फोन केलो. आरे तुज्या दत्ताकूय आवडलें तें. ताणेंय आत्तां फोन केल्लो. गजाननान म्हळें. काल चितेचेर गजाननालें पार्थिव कमकमून पेटिल्ल्या ज्वाळांतल्यान पंचमहाभुतांत विलीन जातालें तेन्ना खूब खूब यादी चित्रफितीसारक्यो सरकल्यो. कोंकणी संस्थांनी ताका वेबिनारांत घेतलोना, डोक्युमेंटेशन केलेंना ह्यो न्हय. उधळपट्टी करूं नाका आं, बचत कर, तुका ह्या सुवार्थी लोकांक वापरूंक दिवं नाका, वेव्हारांत शाणो जा, पक्को जा अशें सदांच शिटकावपी एक साहित्यीक मित्र कायमचो पयस गेलो ह्यो यादी, दृश्यचित्रां. ओम शांती.

मुकेश थळी
फोंडें