भांगरभूंय | प्रतिनिधी
महेंद्रसिंग धोनीच्या फुडारपणाखाला खेळपी चेन्नय सुपरकिंग्सान इंडियन प्रिमीयर लिगेंत (आयपीएल) सनरायझर्स हैदराबादाक 7 विकेटींनी हारयलो. ह्या जैता सयत चेन्नय सुपरकिंग्स गुणतकट्यांत तिसरे सुवातेर पावलो. जाल्यार हैदराबाद णववे सुवातेर आसा.
चेपॉक स्टेडियमाचेर येजमान चेन्नय सुपरकिंग्सान टॉस जिखून हैदराबादाक पयलीं बॅटींग करपाचें आमंत्रण दिलें. हैदराबादान निर्धारीत 20 ओव्हरींनी 7 विकेटी वगडावन फकत 134 धांवड्यो केल्यो. चेन्नय ही सोंपी मोख 8 बॉल आनी सात विकेटी राखून मेळयली.
चेन्नय वतीन ओपनर डेव्हॉन कॉन्वेन अर्द शेंकड्याची खेळी केली. जाल्यार ऋतुराज गायकवाड 35 धांवड्यांचेर बाद जालो. ऋतुराजा उपरांत अजिंक्य रहाणे लेगीत 9 धांवड्यो करून तंबूंत परतलो.
कॉन्वेन 57 धांवड्यांनी 77 धांवड्यो करून चेन्नयचें जैत सोंपें केलें. ताणें 12 चवके आनी एक सको मारलो.
ते पयलीं हैदराबादाक फकत 134 धांवड्यां मेरेन मजल मारप शक्य जालें. ताचे सगले बॅट्समन अपेशी थारले. ओपनर अभिषेक शर्मा (34) आनी राहुल त्रिपाठी (21) हांकां सोडले जाल्यार ताच्या एकाय बॅट्समनाक चेन्नयच्या बॉलरांक येसस्वी रितीन तोंड दिवपाक जमलें ना. चेन्नयचो दावखुरो स्पिनर रवींद्र जडेजान तीन विकेटी घेतल्यो. आकाश सिंग, महीश तिक्षणा आनी मथीशा पथिराणा हांणी दरेकी एक विकेट मेळयली.
बॅट्समनां उपरांत हैदराबादाच्या बॉलरांक लेगीत आपलो ठसो उमठावपाक जमलो ना. चेन्नयच्या ओपनरांनी 66 बॉलांनी 87 धांवड्यांची भागिदारी केली.
—————
चेन्नय आनी अहमदाबादांत प्ले ऑफ मॅची
भारतीय क्रिकेट नियामक मंडळान (बीसीसीआय) आयपीएलाच्या प्ले-ऑफाच्या मॅचींच्या सुवातांची घोशणा केली. चेन्नय आनी अहमदाबाद हांगा क्वॉलिफायर, एलिमिनेटर आनी फायनल मेळून वट्ट चार मॅची जातल्यो. दोनूय शारांनी दरेकी दोन मॅची खेळयतले.
23 मेक चेन्नयच्या चेपॉक स्टेडियमार क्वॉलिफायर-1 आनी 24 मेक चेन्नयच एलिमिनेटर मॅच जातली. 26 मेक अहमदाबादांत क्वॉलिफायर-2 आनी 28 मेक फायनल जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
