भांगरभूंय | प्रतिनिधी
अज्ञातां आड गुन्यांव नोंद; कुर्टी वाठारांतली घडणूक
भांगरभूंय । प्रतिनिधी
फोंडें: कुर्टी वाठारांत 21 एप्रीलाक दनपारां शाळेच्या विद्यार्थ्यांक घेवन वचपी कदंबा बस चालकाक अज्ञात तरणांट्यानी बशीच्या कॅबिनांत घुसून मारपेट केलो. तया वेळार बशींत आशिल्ल्या 25-30 विद्यार्थ्यांनी बोवाळ मारिल्ल्यान अज्ञात तरणाट्यांनी गाडयो घेवन पळ काडलो. फोंडें पुलिसांनी अज्ञातां आड गुन्यांव नोंद केला. ह्या प्रकरणांत अज्ञात मनशाचो सोद सुरू केला.
मेळिल्ले म्हायती प्रमाण शुक्रारा दनपारां 2.30 वरांच्या सुमाराक कुर्टीच्या एका हायस्कुलांतल्या विद्यार्थ्यांक घरा पावोवपाक वचपी कदंबा बस चालक एकनाथ काकोडकार (51, कोपरवाडो, कुर्टी) वतालो. कुर्टी पावताच दोन मोटारी बशीच्या दोनूय वटांनी राविल्ल्यान चालकाक बस फुडें काडपाक मेळना जाली. त्या वेळार बस चालकान मोटार चालकांक मोटारी कुशीक काडपाची विनवणी केली. ते उपरांत दोन अज्ञात तरणाट्यांनी बशीच्या कॅबिनांत घुसून बस चालकाक मारपेट केलो.
ह्या प्रकाराक लागून बशींतल्या विद्यार्थ्यांनी बोवाळ मारपाक सुरवात केल्ल्यान आशीकुशीचे लोक धांवून आयले. तशेंच खूबश्या पालकांनी लेगीत घडणुकेचे सुवातेर धांव मारली. मारपेट प्रकरणांत फोंडें पुलीस स्टेशनार कागाळ दाखल केल्या. फोंडें पुलीस अज्ञात तरणाट्यांचो सोद घेतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
