भांगरभूंय | प्रतिनिधी
दोशींचेर कारवाय करपाची नगराध्यक्षाची मागणी
भांगरभूंय । प्रतिनिधी
मडगांवः मडगांव पालिकेंतली 119 पदां हे आदींच रद्द जाल्यांत. कांय पदां परतून कार्यरत करपाची प्रक्रिया चलताली. तातूंत आनीक 10 पदां रद्द जाल्ल्यान नगराध्यक्ष दामोदर शिरोडकार हांणी पदां रद्द जावपाक दोशी आशिल्ल्यांचेर कारवाय करची, अशी मागणी मुख्याधिकाऱ्यां कडेन केल्या.
हे आदीं रितीं जाल्लीं पदां भरचे खातीर वेळार प्रक्रिया सुरू करूंक नाशिल्ल्यान मडगांव पालिकेंतलीं आतां मेरेन 129 पदां रद्द जाल्यांत. ताचेर नगराध्यक्ष शिरोडकार हांणी नाराजी उक्तावन मुख्याधिकारी मॅन्युएल बर्रेटो हांचे कडेन कारवायेची मागणी केल्या. पोरूं जानेवारी आनी फेब्रुवारींत रिती जाल्लीं 13 पदां मार्च मेरेन भरप गरजेचें आशिल्लें. मात प्रशासकीय विभागा कडल्यान घाळपणा चालू आसा. आतां मेरेन अशा प्रकाराक लागून 129 पदां रद्द जाल्यांत.
पदां रद्द प्रक्रियेंत वरिश्ठ कारकून घोळ करतात, अशें दिशिल्ल्यान नगराध्यक्ष शिरोडकार हांणी ताकतिकेन संबंदीत अधिकाऱ्यांची बसका घेतली. हे बसकेंत तांणी अधिकाऱ्यांक धारेर धरले. पदां रद्द जाल्यार कामां कशीं जातलीं, असोय प्रस्न उपस्थीत केलो. फुडल्या 8 दिसां भितर सगळ्या रद्द जाल्ल्या पदां संबंदांत म्हायती दिवपाचे निर्देश नगराध्यक्षान दिल्यात. संबंदीत कारकुनाक मेमो दिवपाचे निर्देश लेगीत प्रशासकीय अधिकारी अभय राणे हांकां दिल्यात. मुख्य कारकून, वरिश्ठ कारकून, कनिश्ठ कारकून, शिपाय, कामगार, मार्केट निरिक्षक अशी विवीध 119 पदां रद्द जाल्ल्यान नगराध्यक्ष शिरोडकार हांणी मुख्याधिकाऱ्यांक हें कित्याक आनी कशें जालें हे संबंदांत अहवाल सादर करपाक सांगिल्लें. ते उपरांत लेगीत जानेवारी आनी फेब्रुवारींत आनीक 13 पदां रद्द जाल्यात. मुख्याधिकारी मॅन्युएल बर्रेटो हांकां नगराध्यक्ष शिरोडकार हांणी लक्ष घालपाचे निर्देश दिले. तशेंच ही वळेरी म्हायती सयत पालिका संचालकांक सादर करून तीं पदां परतून भरचे खातीर परवानगी घेतले, अशें नगराध्यक्षान स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
