भांगरभूंय | प्रतिनिधी
पणजी: नवी दिल्लीच्या विज्ञानीक आनी तकनिकी शब्दावली आयोग आनी मिरामार पणजेच्या धेंपे कला आनी विज्ञान महाविद्यालयाच्या जोडपालवान 17 ते 21 एप्रील अशा पांच दिसांचे कार्यशाळेचें उक्तावण धेंपे महाविद्यालयांत जालें.
ह्या वेळार ऑनलायन पद्धतीन आयोगाचे अध्यक्ष प्रोफेसर गिरिशनाथ झा हांणी हे विशीं ह्यो परिभाशीक उतरावळी बेगिनांत बेगीन तयार करपाची तिश्टत आनी गरज उक्तायली. आयोगाच्यो पालवी संचालिका मर्सी ललरोहलू हमार ह्या पांच दिसांच्या कार्यशाळे खातीर मुजरत हाजीर रावल्यात आनी खासा लक्ष घालतात. ह्या वेळार डॉ. तानाजी हळर्णकार हांचे पूत तुषार हळर्णकार हेय हजर आशिल्ले. तांणी ह्या वावराक आपलो पुराय तेंको उक्तायलो.
हे पांच दिसांचे कार्यशाळेचे समन्वयक प्रोफेसर डॉ. भूषण भावे हांणी प्रास्तावीक केलें. धेंपे महाविद्यालयाच्यो प्राचार्य प्रोफेसर वृंदा बोरकार हांणी आपले फाटले कार्यशाळेंतले अणभव कथन करून नव्या राष्ट्रीय शिक्षण धोरण 2020 च्या हुंबर्यार अशा तरेच्या उपक्रमाची गरज आनी हावेस उक्तायलो.
रसायनशास्त्र, वनस्पतीशास्त्र आनी प्राणीशास्त्र ह्या तिनूय विशयांच्यो परिभाशीक उतरावळी तयार करपाचें काम कोंकणींतले म्हालगडे लेखक आनी संघटक डॉ. तानाजी हळर्णकार हांच्या फुडारपणा खाला विज्ञानीक आनी तकनिकी शब्दावली आयोग नवी दिल्ली हे संस्थेन कांय वर्सां आदी सुरू केल्लें. पूण तांकां आयिल्ल्या अचकीत मरणाक लागून हें काम अर्दकुटें उरिल्लें. तेंच काम तडीक पावोवपा पासत हे कार्यावळीचें आयोजन केला.
हे कार्यशाळेंत दरेका विशयाचे पांच विशय जाणकार आनी दोन भाशा जाणकार आनी हेर जाणकार मेळून सुमार 20 जाण वांटेकार जाल्यात.
हे कार्यशाळेच्यो थळाव्यो समन्वयक वनस्पत शास्त्र विभाग मुखेली आनी सहयोगी प्राध्यापक मंजिरी बर्वे हांणी उपकाराचें उलोवप केलें जाल्यार भारतीय भाशा विभाग मुखेली आनी सहयोगी प्राध्यापक अंजू साखरदांडे हांणी सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
