भांगरभूंय | प्रतिनिधी
भांगरभूंय । प्रतिनिधी
दिवचलः लाखांनी लोकांची श्रद्धा सुवात आशिल्ल्या शिरगांवच्या श्री देवी लईराईची जात्रा सोमार 24 एप्रिलाक जातली. ते खातीर गोंयांतल्या वेगवेगळ्या वाठारांतल्या शेंकड्यांनी धोंडांनी बुधवारच्यान व्रताचरणाक सुरवात केली. तीन वा पांच दीस हे धोंड सामके सोवळ्यांत रावतात.
आपापले पंगड तयार करून हे धोंड गावांतल्यो तळयो, वझरे, देवळां तशेंच खासा माटोव घालून व्रत करतात. हे मजगतीं पवीत्र वातावरम आसता. शेणान सारयल्ली जमीन, सोवळ्यांत उपासाचे खावपाचे जिनस करतात. पांच दीस सामके मंगलमय वातावरण आसता अशें संजय आरोलकार ह्या व्रतस्थ धोंडान सांगलें.
लईराई देवस्थान समितीन शिरगांवांत जात्रेची सगली तयारी सुरू केल्या. राज्य प्रशासनान लेगीत जाय ती सगळी यंत्रणा उबारपाचें काम सुरू केलां. कांय हजारांनी भावीक जात्रेक आनी होमखंणा खातीर येवपाचे आशिल्ल्यान येरादारी वेवस्था आनी हेर तयारे खातीर दिवचलचे मामलेदार राजाराम परब हांणी सगल्या संबंदीत सरकारी अधिकारी आनी देवस्थान समिती पदाधिकाऱ्यांची बसका घेवंन तयारेचो नियाळ घेतलो. आमी जात्रेची तयारी पुराय केल्या अशें लईराई देवस्थानाचो अध्यक्ष गणेश गांवकारान सांगलें.
लईराई जात्रेच्या दिसांत शिरगांवांत व्हडली फेरी भरता आनी तातूंत लाखांनी रुपयाची उलाढाल जाला. बुधवारच्यान शिरगांवांत जात्रेचें वातावरण तयार जालां. अंदू लईराई आनी तिची भयण अशी आख्याईका आशिल्ल्या म्हापशेंच्या मिलाग्रीस सायबिणीचें फेस्त एकाच दिसा 24 एप्रिलाक येवपाचो योग जुळून आयिल्ल्यान हिंदू आनी किरिस्तांव भाविकां मदी सामकें खोशय़ेचें वातावरण आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
