भांगरभूंय | प्रतिनिधी
अखील भारतीय वरिश्ठ मानांकन बॅडमिंटन सर्तींत गोंयचें तनिषा क्रास्टोन दोट्टी किताब जिखलो. सर्तीचें आयोजन हरयाणांतल्या बहादुरगड स्टेडियमाचेर केल्लें.
तनिषान बायलांच्या दोट्टी गटांत आनी मिश्र गटांत वस्तादपण जोडलें.
बायलांच्या दोट्टी गटांत भारताची दोट्टी गटांतली स्टार खेळगडी आश्विनी पोनप्पा हिच्या वांगडा खेळटना राधिका शर्मा आनी तन्वी शर्मा हे जोडयेक 21-13 आनी 21-14 अशा गेमींनी हारयली. जाल्यार मिश्र गटांत तनिषा-साई प्रतीक हे जोडयेन हरिहरन अम्साकरुनन आनी वर्षाली व्ही एस हे जोडयेक आड 21-19 आनी 21-13 अशा सरळ गेमींनी जैत जोडलें.
गोंय बॅडमिंटन संघटनेन तनिषाक परबीं भेटयल्या. फुडारांत आशियायी खेळ आनी सुदिरमन करंड ह्यो दोन म्हत्वाच्यो सर्ती जावपाच्यो आसात. तनिषा आनी तिच्या जोडिदारांक हीं जैतां मोलादीक मानांक गूण मेळोवपा खातीर म्हत्वाच्यो थारतल्यो. ताका लागून भारताच्या पंगडांत वा निवड चांचणीच्या लागसार पावपाक शकता अशें गोंय बॅडमिंटन संघटनेचे सचीव संदीप हेबळेन म्हणलें.
तनिषान राष्ट्रीय पांवड्याचेर मेळयिल्ले येसा खातीर मुख्यमंत्री डॉ. प्रमोद सावंत हांणी ट्वीट करून परबीं भेटयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
