भांगरभूंय | प्रतिनिधी
पांच खेपेचो वस्ताद मुंबय इंडियन्सान येजमान सनरायझर्स हैदराबादाक 14 धांवड्यांनी हारयलो. सचिन तेंडुलकराचो पूत अर्जुन तेंडुलकरान निमाणे ओव्हरींत 20 धांवड्यांची येसस्वी रितीन राखण केली. तशेंच निमाणे ओव्हरींत भुवनेश्वर कुमाराक बाद करून आयपीएल कारकिर्दींतली पयली विकेट लेगीत अर्जुन तेंडुलकरान घेतली. 19वे ओव्हरींत कॅमरुन ग्रीन फकत चार धांवड्यो दिल्यो.
मुंबय इंडियन्सान पयलीं बॅटींग करतना निर्धारीत 20 ओव्हरींनी 5 विकेटी वगडावन 192 धांवड्यो केल्यो आनी उपरांत सनरायझर्स हैदराबादाक 19.4 ओव्हरींनी 178 धांवड्यांचेर आडायलो.
ते पयलीं रोहित शर्मान ल्हान खेळी केली पूण मोठो विक्रम करून तंबूंत परतल्या उपरांत सनरायझर्स हैदराबादाच्या बॉलरांनी मदल्या ओव्हरींनी बरी बॉलींग केली. इशान किशन, कॅमेरून ग्रीन हांकां मोठे शॉर्ट खेळपाक संद दिली ना. पूण, मुंबय इंडियन्सा वतीन खेळपी पूण हैदराबादाचो लोकल बॉय तिलक वर्मान कॅमेरून वांगडा मेळून धांवड्यांचो वेग वाडयलो. उपरांत ग्रीनान अर्द शेंकडो मारून मुंबय इंडियन्साक मोठी धांवसंख्या उबारून दिली.
रोहित शर्मा फॉर्मांत दिसतालो. ताणें टी नटराजना आड कांय आकर्शक शॉर्ट लेगीत मारले. ते उपरांत सनरायझर्स हैदराबादाच्या बॉलरांनी रोखडाचो तांचे बॉलिंगेंत बदल केलो आनी तातूंत रोहित फसलो. 18 बॉलांनी स चवक्यांचे मजतीन 28 धांवड्यो करून रोहित बाद जालो. रोहिताचे विकेटी उपरांत मुंबयची धांवगती सावकाश जाली.
कॅमेरून ग्रीन मोठे शॉर्ट मारपाचो यत्न करतालो. पूण, सनरायझर्स हैदराबादाच्या स्पिनरांनी ताका आडावन दवरिल्लो. 18 बॉलां उपरांत मुंबय इंडियन्साक बॉल शिमे भायर धांवडावपाक येस आयलें. ग्रीनाच्या सक्या उपरांत इशानान परतून आक्रमक भुमिका घेतली. ताणें आयपीएलांतलो चार हजारांचो टप्पो हुपलो.
12वे ओव्हरींत इशान (38) बाद जालो. हैदराबादोच मुखेली एडेन मार्करमान ताची उत्कृश्ट कॅच धरली. ते उपरांत पांचव्या बॉलाचेर मार्करमान आनीक एक जबरदस्त कॅच धरून सुर्यकुमार यादवाक (7) तंबूंत धाडलो. मार्को यान्सेनान एके ओव्हरींत मुंबय इंडियन्साक दोन मोठे धपके दिले.
तिलक वर्मा आनी ग्रीन हांणी 28 बॉलांनी 56 धांवड्यांची भागिदारी करून मुंबयक परतून ट्रॅकाचेर हाडलो. 17वे ओव्हरींत भुवनेश्वर कुमारान ही भागिदारी फोडली. तिलक 17 बॉलांनी दोन चवके आनी चार सक्यांचे मजतीन 37 धांवड्यो करून कॅच बाद जालो.
ग्रीनान 33 बॉलांनी अर्द शेंकडो पुर्ण केलो. टी नटराजनान घाल्ले 18वे ओव्हरींत ग्रीनान तीन चवके आनी एक सको मारून 20 धांवड्यो केल्यो. पूण, भुवनेश्वरान फुडली ओव्हर बरी घाली. ग्रीनान 40 बॉलांनी नाबाद 64 धांवड्यो केल्यो आनी मुंबय इंडियन्साक 5 बाद 192 मजल मारून दिवपाक मजत केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
