भांगरभूंय | प्रतिनिधी
भांगरभूंय । प्रतिनिधी
पणजीः कुडचडें हांका 2018 वर्सा जाल्ल्या बसवराज बारकी हाच्या खून प्रकरणांतली मुखेल दुबावीत आनी बसवराज हाची घरकान्न कल्पना बारकी हिका मुंबय उच्च न्यायालयाच्या गोंय खंडपिठान 25 हजार रुपयांचो जामीन आनी हेर अटींचेर जामीन मंजूर केला. खून प्रकरणाचे प्रत्यक्षदर्शी साक्षिदारांचे साक्षींत तफावत दिसून आयिल्ल्यान न्यायमूर्ती एम एस कर्णिक हांणी जामीन मंजूर केलो.
कुडचडेंच्या अनू अपार्टमेंटाचे दुसरे माळेर भाड्यान रावपी बसवराज बारकी हाचो 2 एप्रील 2018 दिसा कल्पना बारकीन आपल्या वांगड्यांचे मजतीन गळो अंदून खून केल्लो. उपरांत ताचे कुडीचे पांच कुडके करून ते अनमोडच्या रानांत व्हरून वडयल्ले. 35 दिसां उपरांत दुबावीत अब्दुल शेख हाची घरकान्न सिमरन शेक हिणे कुडचडें पुलिलांक म्हायती दितगीर हे खून प्रकरण उक्ताडार आयिल्लें. पुलिसांनी कल्पना हिच्या वांगडा सुरेश कुमार सोळंकी, पंकज पवार, अब्दुल शेख आनी आदित्य गुजर ह्या पांच जाणांक अटक केल्ली. पुलिसांनी आरोपपत्र दाखल केल्या उपरांत न्यायालयान कल्पना बारकीक सोडून हेरांची जामिनाचेर सुटका केल्ली. कल्पनान सत्र न्यायालयांत जामिना खातीर केल्लो अर्ज भायर मारल्या उपरांत तिणे गोंय खंडपिठांत अर्ज केल्लो.
——————————————————–
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
