भांगरभूंय | प्रतिनिधी
भांगरभूंय । प्रतिनिधी
काणकोणः श्रीस्थळ पंचायत वाठारांतल्या बऱ्याच रस्त्यांचे काम सद्या अडून आसा. मागणी करून लेगीत रस्त्याचें डांबरीकरण करपाच्या कामाक कंत्राटदार सुरवात करना. निविदा मंजूर जाल्या पूण तो वर्क ऑर्डर घेना. आपल्या प्रभागांतले लोक ते खातीर आपल्याक खेपतात. आतां रस्त्याच्या डांबरीकरणाक सुरवात केली ना जाल्यार उपासाक बसपाची शिटकावणी श्रीस्थळ पंचायचीचो पंच वांगडी रामू नायकान दिल्या.
काणकोणचो आमदार आनी सभापती रमेश तवडकार हांच्या कानार आपणे ही गजाल घातल्ली. भाटपाल ते दफनभूंय, नवो वाडो धुपेमळ, अर्दफोंडे कॅपेल ह्या रस्त्याच्या डांबरीकरणाक 24 एप्रील मेरेन सुरवात केली ना जाल्यार 26 एप्रील सावन उपासाक बसतलो अशी सूचोवणी दिवपी निवेदन नायक हाणे काणकोणचो उपजिल्होधिकारी, मामलेदार आनी बांदकाम खात्याच्या रस्तो विभागाक दिलां.
निवदेन दिवपा खातीर रामू नायका वांगडा गणेश गांवकार, आंतोन फ़र्नाडीस, टेडी फ़र्नाडीस, जोफ्री फ़र्नाडीस, कायतु फ़र्नाडीस, ट्रिफोंन फ़र्नाडीस, जुलिओ फ़र्नाडीस, इल्फोन फ़र्नाडीस आनी पास्कल फ़र्नाडीस गेल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
