भांगरभूंय | प्रतिनिधी
भांगरभूंय । प्रतिनिधी
म्हापशेंः म्हापशें दत्तवाडी आनी करासवाडा-थिवी उद्देगीक वसणुकींची सुमार 50 लाख रुपयांची घरपट्टी म्हापशें पालिका मंडळाक येणे आसा. 2017 सावन फाटल्या स वर्सां सावन उद्देगीक उदरगत म्हामंडळान ही घरपट्टी पालिकेचे तिजोरेंत जमा करूंक ना.
राज्यांतल्या सगल्या उद्देगीक वसणुकेंतल्या कारखान्यांची घरपट्टी, भोववटा प्रमाणपत्र, बांदकाम परवाने ह्या सारक्या परवान्यांचें शुल्क पयलीं पालिका मंडळ आनी पंचायत ह्या थळाव्या स्वराज्य संस्था कडल्यान वसूल करताले. मात कारखान्याचे धनी ह्या संस्थाक काना-मनार घेनात म्हणून सरकारान हे कर वसूल करून ती रक्कम ह्या स्वराज संस्थांचे तिजोरेंत जमा करपाचें काम उद्देगीक उदरगत म्हामंडळाक करपाक सांगल्लें.
म्हामंडळ 2015 सावन म्हापशें पालिकेक दत्तवाडी आनी करासवाडा वसणुकेची घरपट्टी वसूल करून पालिकेच्या तिजोरेंत भरताली. मात 2017 तें 2022 मेरेनची घरपट्टीचें 50 लाख रुपया अजून तिजोरेंत भरिल्ले नात. दोनूय वसणुकेंचो व्याप सध्या बरोच वाडला. ताका लागून वसाहतींतल्या कारखान्यांची परत मोलावणी केल्यार घरपट्टी रक्कम कांय कोटी केडन पावपाक शकता. उद्देगीक म्हामंडळा कडेन संपर्क सादून घरपट्टी रक्कम मेळोवपाचो यत्न करतले अशें नगराध्यक्ष प्रिया मिशाळ हिणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
