भांगरभूंय | प्रतिनिधी
आगुस्तीन फेर्नांडीस. जल्म 18 जुलय 1981. गांव बामणाभाट आंबावली- केपें. गरीब कुटूंब, सालवासांव आनी दुमीगोस हांकां लग्ना उपरांत खुब वर्सांनी जाल्लो पयलो पूत. सादारण वर्स जाता जाता अकस्मात जोर आयलो. दोतोरा म्हऱ्यांत व्हेलो, इंजेक्शन मारुन घरा हाडलो. जोर कांय प्रमाणांत देंवलो, सोप्याक धरून तो चांट मारुक लागलो. पूण पयलीं बशेन चांट मारुक जायना जाली, एका पांयान लंगडपाक लागलो. दोतोरा कडेन परत व्हेलो. दुसरे पायाक इंजेक्शन दिलें. सांज जाता जाता दुसरोय पांय लुळो पडलो. परतून ताचे कडेन पायांनी चलूंक जालेंना. ताका पोलिओन वेंटोळ घेतलेलो. ते वर्सा खुबशे भुरग्यांक पोलिओन पांगळ केले. तरी आसतना आगुस्तीन केन्नाच आपूण पांगळो म्हूण जगलोना. कशेय तरेन ताणें आपणालें 10 वी मेरेनचें शिक्षण आवयचे आदारान केलें. दोनय हाताचे पाय करून, व्हीलचेर, ट्रायसीकल हाचे आदारान तो मुखार चलत रावलो. तो म्हजो भाचो. भयणीचो चलो.
उपरांत सरकारी पॉलिटेक्निक पणजी हांतूत वस्त्र तंत्रज्ञान डिप्लोमा मेळयलो, तो 2009 वर्सा. हे शिक्षण घेतना ताका पणजे बशीक राविल्ले कडेन वा म्हाविद्यालयाच्या सर्तींनी वांटो घेतना कांय बरे मनीस मेळ्ळें. थंयच्यान ताका बरे मागप्यांचो आदार जालो. जरी ताणें वस्त्र तंत्रज्ञान डिप्लोमा पुराय केलो, तरी ताका आवड संगीताची. ट्रिनिटी कॉलेज लंडन हातूंत ताणें संगीताचें शिक्षण घेतले. ताचेच वरवीं मागीर तो घरांघरांनी वचून ल्हान भुरग्यांक संगीत/ वाजप किबोर्डाचेर शिकोवंक लागलो. आपणे शिकयल्ल्या भुरग्यांच्यो संगीताच्यो कार्यावळी मडगांव रवींद्र भवनात दर वर्सा तो आयोजीत करतालो. ल्हान भुरग्यांक उत्तेजन दितालो. दोनूय पायांनी अपंगुळ आसुनय ताणें संवसार उबो केला. ‘ए फर्न्स संगीत अकादेमी’ ताणें तयार केली. ऑडियो सीडी तयार केल्या. ते भायर ताच्या खऱ्या जिविताची काणी, ‘This Book will change your life’ हें शॉर्ट फिचर फिल्म रामप्रसाद आडपयकार आनी अमेय हेगडे हांणी तयार केलां. तें कान्स आंतरराष्ट्रीय चित्रपट महोत्सवांत शाॅर्ट फिल्म काॅर्नर विभागांत स्क्रीनिंग जालां. संगीताच्या मळार आगुस्तीनान खुब इनामां जोडल्यांत.
ताका दोन चले. फाटल्या 10 जानेराक ताका तिसरो चलो जालो. 12 जानेराक आगुस्तीनाक अपघात जालो. एटेचमेंट स्कूटर ताची. तकलेक घावो जालो. बेशुद्ध आसलो. ल्हवू ल्हवू बरो जाल्लो, फक्त आवाज तितलोच बंद आसलो. पूण, 14 एप्रीलाक दनपारा देडांक ताचो स्वास बंद जालो.
आयज मंगळार 18 एप्रीलाक सकाळीं साडेणवांक आंबावले अवर लेडी ऑफ लूर्डस चर्चीचे शिमेतेरींत ताचे कुडीचेर निमणे संस्कार जातले.
पोब्र फेर्नांडीस
9822128622
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
