मोपा विमानतळार रोखडोच टॅक्सी स्टॅण्ड

भांगरभूंय | प्रतिनिधी

सुदीप ताम्हणकारः आंदोलन स्थगीत; 200 टॅक्सींक प्राधान्य, पीसीपीओ फॉर्म भरपाचो उलो

भांगरभूंय । प्रतिनिधी

पेडणें: मोपा आंतरराष्ट्रीय विमानतळार टॅक्सी स्टॅण्ड रोखडोच अधिसुचीत जातलो. ते नदरेन मुख्यमंत्री डॉ. प्रमोद सावंत आनी पेडणें मतदारसंघाचे आमदार प्रवीण आर्लेकार हांणी दोन दिसां आदीं बसका घेतली. हे बसकेंत मोपा आंतरराष्ट्रीय विमानतळार पेडणें म्हाला खातीर खास टॅक्सी स्टॅण्ड अधिसुचीत करपाची प्रक्रिया येरादारी खात्याचे अधिकारी, जीएमआर कंपनीचे अधिकारी हांकां मुख्यमंत्री डॉ. सावंत हांणी आदेश दिल्यात. ताका लागून आमी सरकाराक 10 दिसांची नोटीस दिवन जर मोपाचेर टॅक्सी स्टॅण्ड अधिसुचीत करपाक सरकारान वेळ काडलो वा अधिसुचीत केलो नाजाल्यार आंदोलन करपाची शिटकावणी दिल्ली. मात मुख्यमंत्र्यान संबंदीत अधिकाऱ्यांक आदेश दिले उपरांत आमी आंदोलन स्थगीत दवरलां. मात जर परतून सरकारी पांवड्या वयल्यान वेळकाडू धोरण आपणायलें जाल्यार मात परतून आंदोलन करपाचो निर्णय घेतले, अशें टॅक्सी संघटणेचे फुडारी सुदीप ताम्हणकार हांणी पत्रकारां कडेन उलयतना सांगलें.

ह्या वेळार रुपेश कुमरकार, राजू नर्से, राहुल कोलवाळकार तशेंच हेर टॅक्सी वेवसायीक हाजीर आशिल्ले.

मोपा विमानतळार टॅक्सी स्टॅण्ड अधिसुचीत जाले उपरांत पयलेच खेपे पेडणेंच्यो 200 टॅक्सी जांचे कडेन टॅक्सी बॅच आसात आनी जांणी पीसीपीओ फॉर्म येरादारी खात्याच्या टॅक्सी वेवसाया संबंदांत भरला तांका प्राधान्य दितले. जांणी कोणे अजीन हो फॉर्म भरूंक ना, तांणी तो भरचो असो उलो ताम्हणकार हांणी मारला.

200 परस अदीक टॅक्सी आसत जाल्यार तांचे खातीर आमी परतून मुख्यमंत्री आनी सरकारा कडेन चड गाडयां खातीर सुवात मागतले. मात जे पेडणेंचे टॅक्सीकार आसात तांणी पीसीपीओ अर्ज भरचो. जे वरवीं तांची नोंद येरादारी कार्यालयांत जाले उपरांतूच थंय कायदेशीर नदरेन टॅक्सी वेवसाय करपाक मेळटलो. टॅक्सी वेवसाय करचे खातीर जो कावंटर खर्च आसा तो सुरवेक 5 लाख रुपया भरचे पडटले. ते खातीर आमी जी 200 टॅक्सी वेवसायिकांची संघटणा करतले तांचे वतीन दरेकल्या कडल्यान शुल्क घेवन ते भरतले. सरकार आनी मुख्यमंत्र्यांचेर आपलो पुराय विस्वास आसा. आमदार प्रवीण आर्लेकार हांणी हो विशय फुडें व्हेला. मोपा विमानतळाचेर टॅक्सी स्टॅण्ड अधिसुचीत करचो ही मागणी आतां कांय दिसांनी पुराय जातली, अशें ताम्हणकार हांणी सांगलें.