भांगरभूंय | प्रतिनिधी
म्हाका आनी म्हज्या भावाक जिवेशीं मारतले, अशें ताणें कांय दिसां पयलीं उलोवन दाखयिल्लें आनी जालेंय तशेंच. गॅंगस्टर आनी आदलो खासदार अतिक अहमद आनी ताचो भाव अशर्रफ हांकां पुलीस बंदोबस्त आसतना तिगांनी येवन फारान मारले. साबरमती बंदखणींतल्यान अतिकाक प्रयागराज हाडिल्लो. हाॅस्पिटलांत तपासणे खातीर व्हरतना ही घडणूक घडली. ताचे दोन दीस पयलीं अतिकाचो तिसऱ्या क्रमांकाचो पूत असद पुलीस एन्कावंटांत मेलो. ताचे दोग पूत हाचे पयलींच बंदखणींत आसात. सिनेमांनी दाखयतात तेच तरेचे हे सगले गुंड. शेंकड्यांनी लोकांक बरे आनी हजारांनी लोकांक वायट. अतिकाच्या नांवाचेर 100 वयर हत्या, खंडणीचे गुन्यांव आसात. तीन पक्षांच्या तिकेटीचेर एक फावटीं आमदार आनी पांच फावटी खासदार म्हूण अतिक वेंचून आयला. तर ताचो भाव एक फावट आमदार. ताचो भंय इतलो की कोणूच ताचे वाटेक वचनाशिल्ले. कायदो मळा वयले मानेस्त स्वताक ताचे आडचे केशी पसून कुशीक दवरताले. टांगेवाल्याचो हो पूत. फांटभूंय कश्टकरी कुटुंबाची. पूण, धावेंत नापास जातकच झटपट गिरेस्त जावपाक ताणें खंडणीचो मार्ग आपणायलो. 17 व्या वर्सा खुनाचो पयलो आरोप. चांदबाबा ह्या गुंडाक पुलीस, फुडारी थर्त भियेताले. हो भंय ना करपाची जापसालदारकी अतिकान घेतली. पुलीस आनी राजकारण्यां कडेन हातमेळवणी केली आनी….. एक गुंड, गँगस्टर राजकी- समाजीक मळाचेर उदेंलो. ताची 415 कोटींची मालमत्ता उत्तर प्रदेश सरकारान जप्त केल्या, 751 कोटींची बेकायदो मालमत्ता मोडून उडयल्या. ताचे कडले शस्त्रांचे 68 परवाने रद्द केल्यात. वायट कामाचो केन्ना ना केन्ना वायटूच जाता, अशें म्हणटात. प्रयागराज घडणुकेंत तें सिद्ध जालां.
अतिकाचेर फारपेट करपी लवलेश तिवारी, अरुण उर्फ कालिया मौर्य, सनी सिंह. तिगूय तरणाटे. उत्तरप्रदेशांतले. तांचीय फाटभूंय गुन्यांवकारी. सनी 10 वर्सां घरा येवंक ना. ताच्या नांवाचेर 15 गुन्यांव आसात. अरुण पुलिसाचो खून करून 15 वर्सां पयलीं पळून गेल्लो. लवलेशाचेर चार गुन्यांव आसात. बंदखणूय जाल्या. तांकां अतिकाचे हत्येची सुपारी कोणे दिली. हाचे फाटल्यान गुंडांची टोळी आसा काय कोण राजकी फुडारी, हाचो सोद सध्या पुलीस घेतात. सध्या अतिक, अश्रफ हांकां घेवन वचपी पुलिसांक निलंबीत केल्यात. तिगूय तरणाटे अतिकाक मारपाकूच आयिल्ले, अशें कांय राजकी फुडाऱ्यांचें मत. एकाय पुलिसान ह्या तरणाट्यांक मारपाक पिस्तुल भायर काडूंक ना. ते धडाधड फारपेट करताले. मागीर स्वता शरण आयले. फार मारतना ते रामाच्या नांवान घोशणा दिताले, अशेंय उक्ताडार आयलां. पाड्या कर्मांनी देवाक मदीं घेवपाचे हालींचे प्रकार हुस्को करपा सारके.
देशांतलें सगल्यांत व्हडलें प्रसारमाध्यम आशिल्ल्या फेसबूक, ट्विटराचेर शेनवारा रातींच्यान हें अतिक- अश्रफ प्रकरण बरेंच गाजता. चडश्यांक हिस्पा भायर खोस जाल्या, तर मेजकेच लोक उत्तर प्रदेशांत कायदो – सुवेवस्था उरूंक ना म्हणटना दिसतात. खबरां चॅनलांचेरुय चर्चा रंगल्या. आमदार- खासदारांक जर पुलीस बंदोबस्तांत आसतना अशे लोक मारपाक लागले, तर तो कायद्याचो, न्यायालयांचो अपमान. हत्येची खोस मनोवप म्हणल्यार न्यायसंस्थांचेर अविस्वास दाखोवप, अशी कांय जाणांची प्रतिक्रिया. तर चडश्यांक गँगस्टरांक अशेच मारपाक जाय, अशें दिसता. सगल्याच काय वेंचिक, तें तांणी सांगूंक ना. सोशल मिडियाचें प्रस्थ बरेंच व्हडलें, ताका लागून प्रतिक्रिया दितना देशाक, उत्तर प्रदेशाक तें मारक थारचेंना हाचो विचार जावंक फावो.
अतिक, अश्रफ हांणी राजू पालाची हत्या घडोवन हाडली. ताचो सोयरो उमेश पाल हाकाय मारलो, असो आरोप आसा. हिंदी सिनेमांनी बेधडक बाजारांत वचून एकामेकांक मारतात, तसले हे प्रकार. समाजीक नदरेनूय हाचेर विचार करपाक जाय. खंडणी, सुपारी घेवपी हे तिशी सकयले तरणाटे. तांकां ह्या मार्गाचेर हाडटा कोण? तांकां पोसता कोण? गुन्यांव करूनय तांकां सोडयता कोण? राजकारणांत गेले वा फुडाऱ्यांच्या फाटल्यान रावले म्हणटकच अपराध माफ जातले, म्हणटकच अपराध… हाची तांकां खात्रीच आसता. रातचो वेव्हार करपी गाडेकारांक, हाॅटेलकारांक धमकी दिवप, फुकट खावप, खंडणी घेवप, ड्रग्स विकप, हप्ते एकठांय करप, सायबाच्या तालार नाचप… हें सगल्याच राज्यांनी चलता. उत्तरप्रदेशांत जें जालें, हें ताचे फुडलें खतरनाक पावल. अशे कितलेशेच अतिक, अश्रफ, तिवारी, मौर्य, सिंह समाजांत
आसात, कांय जाण उक्तेपणी गुन्यांव करतात, कांय
लिपचोरयां!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
