भांगरभूंय | प्रतिनिधी
खबरां संस्था
लाहोरः पाकिस्तानात लाहोरच्या गद्दाफी स्टेडियमाचेर जाल्ले दुसरे टी-20 मॅचींत न्यूझिलंडाक 38 धांवड्यांनी हारयलें. पयली टी-20 मॅच तांणी 88 धांवड्यांनी जिखल्ली. कॅप्टन बाबर आझमाची 101 धांवड्यांची नाबाद केली करून पंगडाक जैत मेळोवन दिलें. तो प्लेयर ऑफ दी मॅच थारलो. पाकिस्तानान टॉस जिखून पयलें खेळून 4 आवट 192 रन केले.
पाकिस्तानान जैता खातीर दिल्ल्या 193 धांवड्यांच्या आव्हाहनाक जाप दितना न्यूझिलंड फकत 7 आवट 154 धांवड्यो करपाक शकलो. बाबरान शेंकडो केलो जाल्यार पाकिस्तानाचो बॉलर हरीश राउफान बॉलिंगेची करामत दाखोवन न्यूझिलंडाच्या 4 बॅट्समनांक आवट केलें.
पयले टी-20 मॅचींत रोखडोच आवट जावपी बाबर आझमान आनी विकेटकीपर मोहम्मद रिझवानाक दुसरे मॅचींत पाकिस्तानाक बरी सुरवात करून दिली. दोगांनीय पयले विकेटी खातीर 99 धांवड्यांची भागिदारी केली. मॅट हॅनरीन 11वे ओव्हरींत रिझवानाक मिचेल करवींं कॅच आवट केलें. दुसऱ्याच बॉलांत हॅनरीन फखऱ जमानाक क्लीन बोल्ड केलें.
रिझवानान 34 बॉलांत 50 धांवड्यो केल्यो. बाबरान 58 बॉलांत 3 सके आनी 11 चौक्यांनी नाबाद 101 धांवड्यो केल्यो. इफ्तिकार अहमदान 19 बॉलांत 33 धांवड्यो केल्यो. न्यूझिलंडाच्या मॅट हॅनरीन दोन जाल्यार रिचन रवींद्र आनी निशमान दरेकी एक विकेट घेतली.
193 धांवड्यांचो फाटलाव करतना न्यूझिलंडाच्यो 44 धांवड्यो जाल्ल्यो तेन्ना तांका शादाब खानान पयलो धपको दिलो. कॅप्टन टॉम लाथनाक (20) ताणे एलबीडब्ल्यू केलें दुसरो ओपनर चेड बोवेस 26 धांवड्यो करून आवट जालो. विल यंग आनी डॅरील मिचेल चड कांय करपाक शकले नात. ताणी दरेकी 9 धांवड्यो केल्यो. मार्क चॅपमनान डाव साल्वार करपाचो यत्न केलो मात दुसरे वटेन तांका वांगोड मेळ्ळो ना. ताणे 40 बॉलांत 65 धांवड्यो केल्यो. राउफान 4 ओव्हरींत 27 धांवड्यो दिवंन 4 विकेटी घेतल्यो. जमान खान, इमाद वसीन आनी शादाब खानाक दरेकी एक विकेट मेळ्ळी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
