भांगरभूंय | प्रतिनिधी
रवी नायक: फोंडेंच्या शेड्युल्ड कास्ट असोसिएशना वतीन मानेस्तांचो भोवमान
फोंडें: समाजाची उदरगत करपा खातीर शिक्षण गरजेचें. ताका लागून दरेकल्यान उच्च शिक्षण घेवन नोकरी करतना समाजाच्या उद्धारा खातीर यत्न करपाची गरज आसा. भारतरत्न डॉ. बाबासायब आंबेडकर हांणी दरेकल्याक न्याय दिवपाचो यत्न केला. तशेंच अन्याया आड लढो दिलो. डॉ. बाबासायब आंबेडकर हांची प्रेरणा दरेकल्यान घेवन समाजा खातीर योगदान दिवपाची गरज आसा असो उलो शेतकी मंत्री रवी नायक हांणी मारलो.
फोंडेंच्या शेड्युल्ड कास्ट असोसिएशना वतीन भारतरत्न डॉ. बाबासायब आंबेडकर जयंती निमतान आयोजीत कार्यावळींत समाजा खातीर योगदान दिल्ल्या मानेस्तांचो भोवमान केलो. ह्या वेळार मंत्री रवी नायक हे मुखेल सोयरे ह्या नात्यान उलयताले. कार्यावळीक माचयेर के. टी. कवळेंकार, अध्यक्ष संतोष बांदेकार, सचीव मुकेश कंवळेंकार आनी भांडारी संतोष सातार्डेंकार हाजीर आशिल्ले.
मंत्री रवी नायक हांचे हस्तुकीं समाजांत योगदान दिल्ले खातीर तुकाराम हळर्णकार, आनंद कंवळेंकार, सुरेश मातोंडकार, ज्ञानेश्वर कंवळेंकार, रघुनाथ रेडकार, प्रभाकर पार्सेकार, प्रकाश कुडाळकार, विश्राम बोरकार आनी गोकुळदास कुडाळकार हांचो शाल, श्रीफळ आनी यादस्तीक भेटोवन भोवमान केलो. तशेंच पत्रकार रमेश वसकार हांकां अंदूंचो दलीत सखा पुरस्कार भेटयलो.
गोकुळदास कुडाळकार हांणी कार्यावळीचें सुत्रसंचालन केलें. संतोष बांदेकार हांणी येवकार आनी मुकेश कंवळेंकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
