भांगरभूंय | प्रतिनिधी
एकांकिका सादर करतल्यांक दितले 10 हजार रुपया: बसकेक दिली म्हायती
वास्को: कोवीड काळांत बंद केल्ल्या बायणा रवींद्र भवनाचे ‘एकांक दर्शनम्’ आनी ‘सृजन श्याम’ हे उपक्रम परत सुरू करपाचो निर्णय घेतलो. ’एकांक दर्शनम्’ दरेका म्हयन्याच्या निमाण्या शेनवारा आनी ‘सृजन श्याम’ दरेका म्हयन्याच्या निमाण्या शुक्रारा सादर जातलो.
हांगच्या एकांकिका कलाकारांक उर्बा मेळचे खातीर बायणा रवींद्र भवनाचे श्याम च्यारी आनी धनवंत डिचोलकार हांणी ‘एकांक दर्शनम्’ हो उपक्रम सुरु केल्लो. ह्या उपक्रमा खाला मुरगांव म्हालांतल्यो विवीध संस्था दरेका म्हयन्याक एक एकांकिका सादर करताल्यो. एकांकिका सादर केल्या उपरांत प्रेक्षक आनी कलाकार हांचे मदीं प्रस्न आनी जापो विचारल्यो वताल्यो. ताका लागून ह्या उपक्रमाक बरो प्रतिसाद मेळटालो. तशेंच सृजन श्याम ह्या उपक्रमा खाला समाजांतल्या विवीध विशयांचेर मानेस्त आपलीं मतां मांडटाले. ही कार्यावळ उण्या कायांतूच लोपकांक खूब आवडिल्ली. कोविडाक लागून हे उपक्रम बंद करचे पडिल्ले. उपरांत बायणा रवींद्र भवनाच्या मुखेल थिएटरांतल्यो एसी बंद पडिल्ल्यान ह्या थिएटराचो वापर करपाक मेळना.
आतां बंद पडिल्ले दोनूय उपक्रम परत सुरु करपाक बायणा रवींद्र भवनाचे अध्यक्ष जयंत जाधव हांणी अनुकूलताय दाखयली. ताका लागून हे उपक्रम सुरु करपा संबंदी एक बसका घेतली. हे बसकेक जयंत जाधव, श्याम च्यारी, धनवंत डिचोलकार, रवींद्र भवनाचे भरेश नायक, प्रवेश आमोणकार, शांताराम पराडकार, विठोबा दाबोळकार, वामन चोडणकार, अनंत नायक, अनूप मालपेंकार, आनंद परब, नंदा होन्नावकार, नारायण महाले, दयानंद राणे, प्रेमनाथ आरोंदेंकार, विजय नागवेंकार, सागर डिचोलकार, वासुदेव साळगांवकार, लवू च्यारी, सुरेश नायक, संतोष पेडणेंकार, शलाका कांबळी आनी हेर हाजीर आशिल्ले. हे दोनूय उपक्रम परत सुरू जाल्ले खातीर सगळ्यांनी समाधान उक्तायलें.
जी संस्था एकांकिका सादर करतले तांकां खर्चा खातीर 10 हजार रुपया दितले. आदीं 8 हजार रुपया दिताले. फुडल्या म्हयन्यां सावन हो उपक्रम सुरू करपाचो निर्णय घेतला. दोनूय उपक्रमां खातीर रवींद्र भवनाचो मिनी हॉल वापरतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
