भांगरभूंय | प्रतिनिधी
डॉ. देविया राणेः पिसुर्ल्यां मनयली भारतरत्न डॉ. बाबासाहेब आंबेडकर हांची जयंती
भांगरभूंय । प्रतिनिधी
वाळपयः भारतरत्न डॉ. बाबासाहेब आंबेडकर हांणी देशाक उदरगतीच्या मार्गाचेर व्हरचे खातीर म्हत्वाचें योगदान दिलां. तांणी बरयिल्ले घटणेचेरूच आयज देश उदरगतीच्या मार्गार चलता. एका काळाचेर देशांत व्हड प्रमाणांत जातीभेदाचें राजकारण चलतालें. आयज परिस्थिती बदल्ल्या. प्रधानमंत्री नरेंद्र मोदी हांच्या फुडारपणा खाला जातीभेदांच्यो वणटी मोडून सगळ्यांक एकाच सुत्रांत बांदपाचो वावर चल्ला. सगळ्यांनी जातीभेदाच्यो वणटी मोडून समाजाचे उदरगतीक योगदान दिवचें, अशी विननणी आमदार डॉ. देविया राणे हांणी केली.
पिसुर्ल्यां देवानंद परब हांच्या घरा डॉ. बाबासाहेब आंबेडकर जयंती मनयली. हे कार्यावळींत आमदार डॉ. राणे उलयताली.
सुरवेक डॉ. आंबेडकर हांच्या फोटवाक फुलांचो हार घातलो आनी उपरांत दिवली पेटोवन डॉ. राणे हांचे हस्तुकीं कार्यावळीचें उक्तावण जालें.
ह्या वेळार माचयेर होंडा जिल्हो पंचायत वांदडी सगुण वाडकार, पिसुर्लेंचे सरपंच देवानंद परब, समाज वावुरपी विनोद शिंदे, उपसरपंच बिजली गावडे, भिरोडेंचे सरपंच उदयसिंह राणे, सत्तरी पत्रकार संघाचे अध्यक्ष उदय सावंत, पंच आत्माराम परब, रुपेश गावडे आनी राजश्री जल्मी, नामदेव च्यारी, सुवर्णा शिलकार तशेंच आदले सरपंच दीपाजी राणे सरदेसाय हाजीर आशिल्ले.
डॉ. आंबेडकर दलीत समाजांत जल्माक आयले. तांकां साबार तरांच्या कश्टांक फुडो करचो पडलो. तरी लेगीत तांणी राजकी मळार उच्च शिक्षीत जावन समाजाक प्रेरणा दिवपाचें काम केलें. तांच्या विचारांक लागून आयज साबार तरणाट्यांचें परिवर्तन जालें. दलीत समाज उदरगतीच्या मार्गार पावलां मारता. तांचो आदर्श दरेकल्यान घेवप तितलेंच गरजेचें आसा. ना जाल्यार फुडारांत देशाचें व्हड लुकसाण जावपाक शकता. डॉ. आंबेडकर हांचो वावर फक्त पुस्तकां पुरतोच मर्यादीत उरनासतना शाळेंत तांच्या वावराची खरी वळख करून दिवप तितलीच म्हत्वाची गरज आसा, अशें डॉ. राणे हांणी सांगलें.
सगुण वाडकार हांणी सांगलें, डॉ. आंबेडकर हांच्या वावराच्या माध्यमांतल्यान देशाची उदरगत जाल्या. तांच्या संघर्शाच्या बलिदानांतल्यान भारताची लोकशाय संवसारांत प्रगल्भ जाल्या. फुडारांत येवपी हजारांनी वर्सां मेरेन तांचे विचार निश्चीत तिगतले आनी तांणी बरयिल्ले घटणेच्या आदाराचेर देश उदरगतीच्या मार्गाचेर पावलां मारीत रावतलो.
देवानंद परब हांणी येवकार दिलो आनी प्रास्तावीक केलें. खंयच्याच जाती धर्माची नसाय करिनासतना ज्या समाजांत उच्च शिक्षीत तरणाटे निर्माण जाले तांच्या वावराचो आदर्श दरेका समाजान घेवन गरजेचें आसा. तशें जाल्यार दरेका समाजाची उदरगत गतीन फुडें वचपाक शकता, अशें तांणी सांगलें. अशोक नायक हांणी येवकार दिलो आनी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
