भांगरभूंय | प्रतिनिधी
भांगरभूंय । प्रतिनिधी
पेडणेः डॉ बाबासाहेब आंबेडक हांका लागून म्हज्या सारको एक सादो मनीस आमदारपदा मेरेन पावपाक शकलो. बाबासाहेबान सगल्या भारतीयांक स्वातंत्र्य, समता, बंधुता आनी न्याय मेळोवन दिलो. मनश्याच्या कल्याणा खातीर तांणी आपली जीण पणाक लायली अशें पेडण्याचो आमदार प्रवीण आर्लेकारान सांगलें.
पेडणे हांगा आंबेडकर गार्डनांत बाबासाहेबाच्या पूर्ण पुतळ्याक फुलां हार घालून तांका हाजीर आशिल्ल्यांनी अभिवादन केलें. पेडणेची उपनगराध्यक्ष आश्विनी पालयेकार, तोरसेंचो उपसरपंच उत्तम वीर, नगरसेविका विशाखा गडेकार, उषा नागवेकार, तृप्ती सावळ देसाय, सिद्धेश पेडणेकार, चंद्रकांत जाथव, संजय पालयेकार, रामा पेडणेकार ह्या वेळार हाजीर आशिल्ले.
भारत स्वतंत्र जाल्या उपरांत राज्य घटना तयार करपाचे काम ज्या मसुदा समिती कडेन दिल्ले तिचे अध्यक्ष डॉ आंबेडकर आशिल्ले. प्रगाढ विद्वत्तेच्या बाबासाहेबान हेर देशाच्या राज्य घटनाचो अभ्यास करून भारता खातीर समाज वेवस्थेचो विचार करून देशाक एक परिपूर्ण संविधान तयार करून दिलें. संवसारांत एक आदर्श राज्य घटना म्हणून तिची वळख आसा अशें उषा नागवेकारान सांगलें.
तांबोस्काराचो उपास फाटीं
मजगतीं, आंबेडकर गार्डनांतल्या बाबासाहेब आंबेडकराच्या पुतळ्याचें उक्तावण करपाचे मागणे खातीर ज्येश्ठ नागरीक तुकाराम तांबोस्कार हाणे जाहीर केल्ल्या प्रमाण आंबेडकर जंयती दिसा पुतळ्या कडेन शुक्रराक सकाळी उपासाक सुरवात केली. मात आमदार प्रवीण आर्लेकारान गार्डनाचें सोबितीकरण करून ते उपरांत पुतळ्याचें उक्तावण करपाचें उतर दिल्ल्यान तांणी आपलो उपास फाटीं घेतलो. फाटल्या 7 वर्सां सावन उक्तावणाविणे आशिल्ल्या पुतळ्याचें आंबेडकर जंयती पयलीं उक्तावण करची अशी तांची मागणी आशिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
