भांगरभूंय | प्रतिनिधी
भांगरभूंय । खबरां मेज
पणजीः गोंय कला अकादमी आनी तियात्र अकादमी हांच्या जोड पालवान सोमार 17 एप्रिलाक पणजे शारांतल्या इन्स्टिट्यूट मिनेझीस ब्रांगाझा संस्थेच्या मुखेल मिनेझीस ब्रागांझा सभाघरांत साजे 4 वरांचेर तियात्र दीस मनयतले.
ह्या निमतान गोंयांतल्या तियात्र मळांक योगदान दिल्ल्या पांच ज्येश्ठ तियात्र कलाकारांचो भोवमान करतले. आंतोनियो झेवियर फर्नांडीस (लेखक, दिग्दर्शक, कलाकार आनी गायक), मिनिनो फर्नांडीस ऊर्फ मिनिनो दे बांदार ( कलाकार, दिग्दर्शक, लेखक), जुवांव बाप्तीस डिसोझा (लेखक, कलाकार), मान्युएल फ्रान्सिस्को फर्नांडीस (कलाकार, दिग्दर्शक) आनी मेनी क्रिस्ता फर्नांडीस (कलाकार) हांचो भोवमान करतले.
कार्यावळीक कला आनी संस्कृती मंत्री तशेंच कला अकादमीचे अध्यक्ष गोविंद गावडे मुखेल सोयरे म्हणून हाजीर रावतले. ताचे हस्तुकीं तियात्र कलाकरांचो भोवमान जातलो. ह्या वेळार तियात्र अकादमीचे उपाध्यक्ष सोकोरो फर्नांडीस हाजीर रावतले. तियात्र दीस कार्यावळीक कला मोग्यांनी व्हडा संख्येन हाजीर रावचें अशें कला अकादमी आनी तियात्र अकादमीन मागलां.
हेच कार्यावळीक जोडून कला अकादमीन घेतिल्ले ए ग्रूप तियात्र सर्तींची इनाम भेटवण कार्यावळ जातली. सर्तींत इनामां मेळयल्ल्या तियात्र पंगडांक मानेस्ताचें हस्तुकीं इनामां भेटयतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
