जडेजा-धोनी हांचे यत्न फुकट

भांगरभूंय | प्रतिनिधी

इंडियन प्रिमीयर लिगेंत (आयपीएल) आयज जाल्ले उमळशीक वाडोवपी मॅचींत राजस्थान रॉयल्सान येजमान चेन्नय सुपरकिंग्साक तीन विकेटींनी हारयलो.

राजस्थान रॉयल्सान दिल्ले 176 धांवड्यांचे मोखीचो फाटलाव करतना चेन्नय सुपरकिंग्साक निर्धारीत 20 ओव्हरींनी 6 विकेटी वगडावन 172 धांवड्यो करप शक्य जाल्यो.

मॅच उमळशीक वाडोवपी जाली. निमाण्या बॉलाचेर चेन्नयक जैता खातीर पांच धांवड्यांची गरज आशिल्ली. पूण, राजस्थानाच्या संदीप वर्मान अखेरच्या बॉलाचेर चेन्नयचो मुखेली महेंद्रसिंग धोनीक व्हड शॉर्ट खेळपाक दिलो ना आनी धोनीक फकत एक धांवडेचेर समाधान मानचें पडलें.

मोखीचो फाटलाव करपी चेन्नय वतीन डॅव्हॉन कॉन्वेन 38 बॉलांनी स चवक्यांचे मजतीन 50 धांवड्यो केल्यो. ताचे खेरीत अजिंक्य रहाणेन 31 धांवड्यांचें योगदान दिलें. अखेरच्या ओव्हरींनी रवींद्र जडेजान आनी धोनीन आक्रमक बॅटींग केली. पूण, तांकां आपल्या पंगडाक जैत मेळोवन दिवपाक जमलें ना. जडेजान नाबाद 25 आनी धोनीन नाबाद 32 धांवड्यो केल्यो.

ते पयलीं राजस्थान रॉयल्साचो ओपनर यशस्वी जैस्वाल काल अपेशी थारलो. पूण, देवदत्त पडिक्कल आनी जॉस बटलर हांणी चेन्नय सुपरकिंग्साच्या बॉलरांची बॉलींग फोडून काडली. आर आश्विनानूय बरी बॅटींग केली. पडिक्कल आनी आश्विन ह्या दोगांयच्योय मोईन अलीन स्लिपांत कॅची सोडून जीवनदान दिलें आनी हीच जीवनदानां चेन्नय सुपरकिंग्साक म्हारग पडलीं.

यशस्वी जैस्वालान (10) पयले ओव्हरींत दोन चवके मारून बरी सुरवात केल्ली. पूण, तुषार देशपांडेन दुसरे ओव्हरींत ताची विकेट घेतली. पावर प्लेंत खेळपाची संद मेळिल्ल्या पडिक्कलाची मोईन अलीन कॅच सोडली आनी ताचो फायदो घेत ताणें उपरांत जबरदस्त बॅटींग केली.

पडिक्कल आनी बटलर हांणी 41 बॉलांनी 77 धांवड्यांची भागिदारी केली. अखेरेक पडिक्कल 26 बॉलांनी 5 चवक्यांचे मजतीन 38 धांवड्यो करून कॅच बाद जालो. रवींद्र जडेजान पडिक्कला फाटोफाट संजू सॅमसनाक (0) बोल्ड केलो. फुडल्या बॉलाचेर आश्विन लेगीत बाद जातलो आशिल्लो. पूण, मोईन अलीन परतून कॅच सोडली. जडेजान 21 धांवड्यो दिवन 2 विकेटी घेतल्यो.

मोईन अलीचे चुकीच्या थ्रोक लागून आश्विन धांवबाद जाता जाता वांटावलो. दोन जीवनदानां मेळिल्ल्या आश्विनान 15वे ओव्हरींत दोन सके मारले. पूण, तिसऱ्या बॉलाचेर लेगीत सको मारपाच्या यत्नांत तो कॅच बाद जालो. ताणें 22 बॉलांनी 1 चवको आनी दोन सक्यांचे मजतीन 30 धांवड्यो केल्यो.

17वे ओव्हरींत मोईन अलीन राजस्थान रॉयल्साक मोठो धपको दितना जॉस बटलराक बोल्ड केलो. बटलरान 37 बॉलांनी 1 चवको आनी तीन सक्यांचे मजतीन 52 धांवड्यो केल्यो.

अखेरच्या ओव्हरींनी शिमरोन हेटमायरान बरी बॅटींग करतना चेन्नय सुपरकिंग्सा मुखार आव्हानात्मक धांवसंख्या उबी केली. ताणें 18 बॉलांनी दोन चवके आनी दोन सक्यांचे मजतीन नाबाद 30 धांवड्यो केल्यो. राजस्थानान निर्धारीत 20 ओव्हरींनी 8 विकेटी वगडावन 175 धांवड्यो केल्यो. आकाश सिंग आनी तुषार हांणी दरेकी दोन विकेटी घेतल्यो.