भांगरभूंय | प्रतिनिधी
माशेल: उदका स्रोत मंत्री सुभाष शिरोडकार आनी कुमारजुंवेंचे आमदार राजेश फळदेसाय हांणी काल (बुधवारा) तिसवाडी म्हालांतले करमळे अस्तित्वांत आशिल्ल्या तळे सावत असोसिएशनाच्या खाजन बांदाच्या सुदारणा कामाची बुन्याद घाली. अशींच कामां पुराय मतदारसंघांत करतले अशें आमदार राजेश फळदेसाय हांणी सांगलें.
हीं कामां प्राधान्यान करपा खातीर उदका स्रोत मंत्र्याचो पुराय तेंको आशिल्ल्याचें आमदार फळदेसाय हांणी सांगलें. करमळे ह्या बांदाच्या कामा खातीर अदमाशेक 98.83 लाख रुपया खर्च येतलो. हें काम 15 एप्रीलाक सुरू जावन 12 डिसेंबर मेरेन ते पुराय जातलें अशेंय तांणी सांगलें.
फाटल्या वर्सा कुमारजुवेंचो आमदार म्हूण वेंचून आयले उपरांत फळदेसाय हांणी बांद तशेंच सांत इस्तेव, दिवाडी आनी कुमारजुंव्यांतली खाजन जमनींतल्या मानशीच्या दारांच्या दुरुस्तीचें काम प्राधान्यान हातांत घतले अशें सांगिल्लें. उदकाच्या सांठ्याचो सांबाळ करतनाच कांय सांठे पुनरुज्जिवीत करपाचें काम मतदारसंघांत रोखडेंच हातांत घेतले अशें फळदेसाय हांणी सांगलें.
फाटल्या वर्सा मे म्हयन्यांत दिवाडी ते करमळी हांगासरले मोरयेच्या मोडिल्ल्या दारांची पळोवणी करून बांदाच्या दुरुस्तीचें आनी उदक सांचिल्ल्या सुवाते मदलें उदक कुशीक काडटलें अशें आस्वासन दिल्लें. दुरुस्तीचें काम लेगीत उदका स्रोत खात्या वतीन करतले अशें आमदार फळदेसाय हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
