भांगरभूंय | प्रतिनिधी
गोविंद गावडे: वळवय 5 कोटी खर्चून नवीं उदकाचीं पायपां घालपाच्या कामाचो शुभारंभ
सावयवेरें: गोंयच्या चाळीस मतदारसंघांतल्यान सगळ्यांत चड आडखळी आनी समस्या म्हज्या प्रियोळ मतदारसंघांत आशिल्ल्यो. उदका खातीर बायलांक सोंसचें पडटा तें दुख्ख म्हाका खबर आशिल्लें. गांवगिर्या वाठारांनी उदका खातीर त्रास सोंसचे पडले. आमकां टँकरांची वाट पळोवची पडली. स्वाभिमानी आनी अभिमानी कामगारांच्या यत्नांक लागून उदका सारकिल्ली मुळावी गरज भागोवपाचे यत्न पुराय जाले. ह्या दोन-तीन पंचायत वाठारांनी सुमार 80 टक्के काम पुराय जालां, अशें खेळां, कला आनी संस्कृती मंत्री गोविंद गावडे हांणी सांगलें.
वेरें-वाघुर्में ग्रामपंचायत वाठारांतल्या कावंगाळ, मदलोवाडो, कोणीर-सावय ते घाणो तशेंच वळवय ग्रामपंचायत वाठारांत सुमार 5 कोटी रुपया खर्चून उदकाची पुरवण करपा खातीर नवीं पायपां घालतले. ह्या कामाचो शुभारंभ हालींच वेरें – वाघुर्में ग्रामपंचायतीच्या आंगणांत जालो. ह्या सुवाळ्याक मुखेल सोयरेे ह्या नात्यान मंत्री गावडे उलयताले.
मुर्डी वाठारांतल्या म्हादाय न्हंयचेर 108 कोटी रुपया खर्च करपाची येवजण आसा आनी थंय धरण बांदपाची काम सध्या चालू आसा. शितोळ तळ्याच्या प्रकल्पा खातीर साळगांवकार कडल्यान 2700 चौखण मिटर जमीन फुकट मेळ्ळ्या. ह्या प्रकल्पाक 27 कोटी रुपया खर्च येतलो. ह्या वाठारांत पर्यटक कशे येतले आनी बेकारी कशी उणी जातली हाचेरूय आमच्या सरकारान विचार केला. गोंय भारतांतलें आदर्श राज्य करपाचो सरकारान संकल्प केला. हाका सगळ्यांची सहकार्याची गरज आशिल्ल्याचो उलो मंत्री गोवींद गावडे हांणी मारलो.
ह्या वेळार कुर्टी जिल्हो पंचायत वांगडी प्रिया चारी, श्रमेश भोसले, सरपंच शोभा पेरणी, वळवयचे सरपंच विनायक वेंगुर्लेंकार, तिवरें पंचायतीचे सरपंच जयेश नायक, उपसरपंच बाबू गावडे, पंच अक्षय नायक, रोहन तारी, नवनाथ वेलकासकार, लोचन नायक, स्वाती पालकार, हर्षा गावडे, उदका खात्याचे सहाय्यक अभियंता जांबावलीकार आनी हेर हाजीर आशिल्ले. सुरवातेक मानेस्तां हस्तुकीं नाल्ल फोडून आनी मंत्र्या हस्तुकीं नांवतखट्याचें अनावरण करून उदकाचीं पायपां घालपाच्या कामाचो शुभारंभ जालो.
प्रिया चारी हांणी उदकाचे आनी हेर प्रस्न सोडोवपाक सगळ्यांन लोकप्रतिनिधींक सहकार्य करचें. बायलांचें दुख्ख बायलांकूच समजता अशें तिणें म्हणलें.
ह्या वेळार श्रमेश भोसले, आदले सरपंच सत्यवान शीलकार हांणी आपले विचार मांडले.
येवकार गीतान कार्यावळ सुरू जाली. सरपंच शोभा पेरणी हांणी प्रास्तावीक आनी येवकाराचें उलोवप केलें. सुत्रनिवेदन दीपक वेलकासकार आनी निमाणें बाबू गावडे हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
