भांगरभूंय | प्रतिनिधी
भांगरभूंय । प्रतिनिधी
पर्वरीः तिळारी धरण प्रकल्पांतल्यान पर्वरी आनी गिरीक उदका पुरवण करपी पायपलायन कुचेली हांगा फुटल्ल्यान सध्या पर्वरी वाठारांत पियेवपाच्या उदकाचो खर उणाव जाला. पायपलायन सारकी करपाक धा-पंदरा दीस लागतले अशें पर्वरेचो आमदार आनी पर्यटन मंत्री रोहन खवंटे हाणे सांगलें. अस्नोडें उदका शुद्धिकरण प्रकल्पांतल्यान पर्वरेच्या प्रकल्पांत चड उदक सोडपा संबंदी आपणे उदकास्रोत मंत्री सुभाष शिरोडकारा कडेन उलोवणी केल्यांत अशें तांणे सांगलें.
तिळारी प्रकल्पांतल्यान पर्वरेच्या उदका शुद्धिकरणांत उदक हाडून ताचेर प्रक्रिया करून ताची पर्वरी तशेंच रेईश मागुश वाठारांत पुरवण करतात. पायपलायन फुटल्ल्यान सध्या पर्वरी वाठारांतल्या लोकांक पदरमोड करून उदकाचे टॅन्कर हाडटे पडटा. काय लोक उदका बाटल्यो विकत्यो घेवन उदकाची गरज भागयतात.
पर्यटन मंत्री रोहन खवंटे आनी साळगांवचो आमदार केदार नायकान पायपलायन फुटल्या थंय वचून दुरुस्ती कामाची पळोवणी केली आनी जाता तितल्या बेगीन ती सारकी करपाची सूचोवणी केली. आमठाणे तें गिरी मजगतीं नवी पायपलायन घालून उदक हाडपाची वेवस्था करतले. ह्या कमा खातीर निविदा काडल्या अशी म्हायती खवंटेन दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
